Innlent

Klæðning lögð um Pennudal áleiðis upp á Dynjandisheiði

Kristján Már Unnarsson skrifar
Klæðningarflokkur Borgarverks hóf að klæða Pennusneiðing bundnu slitlagi í morgun.
Klæðningarflokkur Borgarverks hóf að klæða Pennusneiðing bundnu slitlagi í morgun. Borgarverk/Einar Örn Arnarson

Klæðningarflokkur frá Borgarverki, undirverktaka ÍAV, hóf í morgun að leggja fyrri umferð bundins slitlags á kafla Vestfjarðavegar um Pennudal, eða Penningsdal, ofan Flókalundar í Vatnsfirði. Þetta er vegarkafli sem opnaður var umferð í nóvember en ekki náðist þá að klæða hann fyrir veturinn vegna óhagstæðs veðurs.

Kaflinn er 3,8 kílómetra langur og liggur um svokallaðan Pennusneiðing og vonast Einar Örn Arnarson, sviðsstjóri klæðningar hjá Borgarverki, til að verkið klárist á morgun. Umferð er á meðan hleypt um gamla veginn sem liggur neðar í hlíðinni.

Vegafarendur gætu þó eitthvað lengur þurft að aka um gamla veginn. Til skoðunar er að leggja efra lag klæðningar á kaflann um leið og fyrra lagið er búið að jafna sig og gæti farið svo að beðið verði með að hleypa umferð á nýja veginn á meðan.

Þá þurfa vegfarendur enn um sinn að bíða eftir slitlagi á 4,4 kílómetra kafla ofan Pennusneiðings, sem liggur milli Þverdals og Norðdalsár og inn á Bíldudalsveg. Þar er undirbyggingu vegarins fyrir slitlag ekki lokið en Einar Örn vonast til að unnt verði að klæða hann í kringum mánaðamót júlí og ágúst.

Starfsmenn Borgarverks lögðu bundið slitlag á nýja kaflann í Dynjandisvogi síðastliðið haust.Borgarverk/Einar Örn Arnarson

Vegagerðin er hluti fyrsta áfanga endurbyggingar Vestfjarðavegar um Dynjandisheiði, sem Íslenskir aðalverktakar annast, en 4,3 kílómetra kafli í botni Arnarfjarðar, milli Mjólkár og Dynjanda, er einnig liður í verkinu. Þar var fyrri umferð slitlags lögð á síðastliðið haust. Stefnt er að því að seinni umferðin verði lögð á þann kafla í beinu framhaldi af Pennusneiðingi, að sögn Einars. Hann tekur þó fram að það ráðist af veðri.

Fram kom í fréttum Stöðvar 2 í byrjun mánaðarins að Vegagerðin er búin að auglýsa næsta útboð á Dynjandiheiði, 12,6 kílómetra kafla sem liggur um hæstu hluta heiðarinnar. Sá kafli nær frá Norðdalsá, um efstu hlíðar Geirþjófsfjarðar og norður fyrir sýslumörk. Tilboðsfrestur er til 5. júlí næstkomandi. Framkvæmdatími er áætlaður tvö ár og gert ráð fyrir verklokum 15. júlí 2024.

Hér má sjá frétt Stöðvar 2 um það útboð:

Vegagerð Samgöngur Vesturbyggð Ísafjarðarbær Dýrafjarðargöng Ferðamennska á Íslandi

Tengdar fréttir

Vegagerðin býður út langan vegarkafla á Dynjandisheiði

Þrettán kílómetra langur vegarkafli á hæsta hluta Dynjandisheiðar verður boðinn út á morgun. Samtímis er Vegagerðin að skoða málamiðlun að nýju vegstæði við fossinn Dynjanda til að hlífa sem mest bæði landslagi og fornminjum.

Keppast við vegabætur áður en holskefla ferðamanna ríður yfir

Vestfirðingar gleðjast yfir því í dag að ferðabókaútgefandinn Lonely Planet hafi sett fjórðunginn í efsta sæti yfir þau svæði heims sem best sé að heimsækja á næsta ári. Ferðamanna bíða hins vegar holóttir malarvegir og einbreiðar brýr fyrir vestan og það stefnir í bið eftir næsta áfanga á Dynjandisheiði.

Styttist í slitlagið á fyrstu kaflana á Dynjandisheiði

Miklar samgöngubætur verða á Vestfjörðum á næstu vikum þegar tveir erfiðir vegarkaflar, á Dynjandisheiði og í botni Arnarfjarðar, verða leystir af hólmi með nýjum slitlagsköflum, samtals yfir tólf kílómetra löngum.

Börnin úr Kjálkafirði í skóla á Þingeyri um Dýrafjarðargöng

Foreldrarnir sem byggðu eyðijörð í Kjálkafirði kjósa að senda börnin sín í skóla á Þingeyri fremur en á Patreksfjörð og nýta sér þannig nýopnuð Dýrafjarðargöng. Þannig stytta þau tíma barnanna í skólaakstri úr þremur klukkustundum á dag niður í tvær klukkustundir á dag.

Þurfa að vinna rösklega í vetur á Dynjandisheiði

Framkvæmdir eru komnar á fullt við fyrsta áfanga nýs þjóðvegar yfir Dynjandisheiði. Fyrstu tíu kílómetrarnir eiga að vera tilbúnir með malbiki innan ellefu mánaða. Myndir frá sprengingum á verkstað mátti sjá í fréttum Stöðvar 2.

Mest lesið


Fleiri fréttir

Sjá meira


×

Mest lesið