Fertugur Zlatan framlengir við AC Milan

Zlatan er fæddur árið 1981 og verður því 41 árs gamall í byrjun október á þessu ári. Flestir knattspyrnumenn eru löngu búnir að leggja skóna á hilluna áður en þeir komast á fimmtugsaldurinn, en Zlatan er ekki beint eins og flestir knattspyrnumenn.

Þessi fertugi framherji lék aðeins 23 deildarleiki á seinasta tímabili með AC Milan, en hann hefur verið frá keppni síðan í maí þegar hann fór í aðgerð á hné. Hann sagði síðar frá því að hann hafi leikið með slitið krossband og að hann hafi varla sofið í sex mánuði fyrir verkjum.

Nýi samningurinn sem Zlatan skrifaði undir gildir út næsta tímabil, en búist er við því að hann snúi aftur á völlinn eftir meiðsli í nóvember.