Barcelona segir nú­verandi samning Frenki­e de Jong ó­lög­legan

Mikið hefur verið rætt og ritað um stöðu Frenkie de Jong í allt sumar. Fjárhagsstaða Barcelona er vægast sagt slæm og hefur verið talið að félagið þurfi að selja leikmenn til að geta skráð þá leikmenn sem það hefur sótt til leiks.

De Jong, sem á inni fleiri milljónir evra í ógreidd laun, hefur verið hvað helst orðaður við brottför enda bæði Manchester United og Chelsea á eftir honum. Bæði Joan Laporta, forseti félagsins, og Xavi, þjálfari þess, hafa gefið til kynna að Barcelona vilji halda Hollendingnum í Katalónu en Laporta hefur tekið skýrt fram að þá þurfi De Jong að taka á sig launalækkun.

Nýjustu vendingar í samningsmálum De Jong eru þær að Laporta og félagar í stjórn Barcelona telja forvera sína ekki hafa verið með allt uppi á borðum er leikmaðurinn fékk nýjan samning í október árið 2020.

Samkvæmt The Athletic lét stjórn félagsins leikmanninn og þá sem sjá um hans mál vita þann 15. júlí síðastliðinn að ekki væri allt með felldu og samningur hans væri í raun ólöglegur. Laporta vill að De Jong fari aftur á sömu laun og hann var á fyrir 20. október 2020. Fari svo að De Jong neiti þá er Barcelona tilbúið að fara með málið fyrir dómstóla.

Þannig er mál með vexti að De Jong fékk tveggja ára framlengingu haustið 2020. Hann lækkaði í launum tímabilin 2020-21 og 2021-22 en átti svo að fá 18 milljónir evra frá 2022 til 2026.

Gerard Piqué, Marc-Andre ter Stegen og Clement Lenglet skrifuðu undir samninga með svipuðum ákvæðum. Var þetta eitt af síðustu verkum Josep Bartomeu sem forseta félagsins en hann og þáverandi stjórn tapaði skömmu síðar í forsetakosningum Barcelona.

Núverandi stjórn telur sig hafa sönnun fyrir því að samningar leikmannanna séu ekki löglegir og er hún tilbúin að fara með mál sitt fyrir dómstóla. Ekki er vitað hvort Piqué, Ter Stegen eða Lenglet (sem er á láni hjá Tottenham Hotspur) hafi fengið bréf líkt og það sem De Jong fékk.

Samkvæmt The Athletic þá er fyrrverandi stjórn félagsins handviss um að allir samningar sem hún gerði séu löglegir. Í frétt Athletic kemur einnig fram að leikmannasamtök Hollands sem og FIFPRO, leikmannasamtök FIFA, fylgist grannt með stöðu mála þar sem það hefur verið gefið til kynna að Barcelona sé að reyna kúga De Jong til að skrifa undir nýjan samning.

Þrátt fyrir allt sem hefur gengið á vill hinn 25 ára gamli Frenkie de Jong vera áfram í Katalóníu. Fari svo að hann yfirgefi félagið þá er talið líklegast að hann gangi í raðir Man United eða Chelsea en bæði lið hafa sýnt honum mikinn áhuga. Talið er að Lundúnaliðið sé tilbúið að borga uppsett verð sem og þær milljónir evra sem Hollendingurinn á inni hjá Barcelona.

Þrátt fyrir allt fjármálavesen Börsunga hefur félagið samt sótt fimm leikmenn í sumar. Franck Kessie og Andreas Christensen komu á frjálsri sölu frá AC Milan og Chelsea. Raphinha var keyptur fyrir dágóða summu frá Leeds United og það sama má segja um Robert Lewandowski og Jules Koundé.