Kristján: Það kveikti í okkur að lenda undir

„Þú ert að taka svarið frá mér með spurningunni,“ sagði Kristján Guðmundsson léttur aðspurður hvort hans lið hafði þurft að lenda undir til að komast í gang. 

„Það er hægt að segja að markið sem við fengum á okkur hafi kveikt í okkur. En mér fannst við spila ágætlega í upphafi þrátt fyrir að hafa lent undir.“

Sóknarleikur Stjörnunnar var frábær sem skilaði ekki bara sjö mörkum heldur töluvert af færum og hefðu mörkin getað verið fleiri.

„Andstæðingurinn lagðist aftarlega og það tók tíma að aðlagast því en við fengum færi til að jafna og um leið og við jöfnuðum þá var þetta aldrei spurning og við fundum fullt af svæði til að spila í gegnum.“

Þrátt fyrir að vera 3-1 yfir gaf Stjarnan ekkert eftir í síðari hálfleik sem skilaði fjórum mörkum til viðbótar.

„Okkur tókst að sækja í þau svæði sem við vildum fara í. Við vissum að þær myndu mæta trítilóðar inn í síðari hálfleik og við urðum að mæta þeim í upphafi seinni hálfleiks til að fá færi líkt og við fengum í fyrri hálfleik,“ sagði Kristján Guðmundsson að lokum.