Samúel Kári til liðs við Viðar Örn og fé­laga í A­tromitos

Samúel Kári er uppalinn í Keflavík en þessi 26 ára miðjumaður hefur komið víða við til þessa. Hann fór ungur að árum til Reading á Englandi og þaðan hélt hann svo til Vålerenga í Noregi. Á lokaári sínu þar var hann lánaður til Viking áður en hann skrifaði undir hjá Paderborn 07 í Þýskalandi.

Hann stoppaði stutt við í Þýskalandi og gekk aftur í raðir Viking árið 2020. Samningur hans við norska félagið átti að renna út nú um áramótin og því ákvað Viking að taka tilboði Atromitos í leikmanninn. Keflvíkingurinn skrifar undir tveggja ára samning í Grikklandi.

Samúel Kári á að baki átta A-landsleiki fyrir Íslands hönd, sá síðasti kom árið 2019. Þá spilaði hann á sínum tíma 43 leiki fyrir yngri landslið Íslands.

Grikkland hefur verið nokkuð vinsæll áfangastaður íslenskra knattspyrnumanna í sumar. Alls leika nú fimm íslenskir leikmenn í deildinni. Markvörðurinn Ögmundur Kristinsson er enn hjá Olympiacos, Hörður Björgvin Magnússon er hjá Panathinaikos og Guðmundur Þórarinsson er hjá OFI Crete.