Arnar Gunnlaugsson: Eyjamenn voru bara kraftmiklir

„Við máttum bara þakka fyrir þetta stig. Vestmannaeyingar voru bara mjög flottir og sterkir og ég ætla ekkert að fara í að þeir hafi átt þetta stig skilið því við vorum lélegir því þeir voru bara góðir. Við vorum bara virkilega heppnir að sleppa lifandi frá þessum leik,“ sagði Arnar.

ÍBV byrjaði leikinn mjög kraftmikið en á sama tíma virtust Víkingarnir eitthvað ekki rétt stilltir.

„Ég held þú hittir naglann á höfuðið. Eyjamenn voru bara kraftmiklir. Oft þegar lið tapa leikjum þá er það afsökun að við vorum lélegir en þeir voru bara góðir. Við áttum engin svör við þeirra pressu, þeir neyddu okkur í mistök og unnu boltann. Eins og ég segi þá er ég bara virkilega ánægður með að fá þetta stig,“ sagði Arnar.

Víkingar lentu 0-2 undir í leiknum en þegar þeir komu út í síðari hálfleikinn var staðan 1-2 og Víkingur manni fleiri.

„Ég hefði viljað sjá mína menn færa boltann betur og vera bara klókari. Það var mjög vel gert hvernig ÍBV tók seinni hálfleikinn. Þeir gerðu það bara nákvæmlega eins og ég myndi gera. Ég ætla ekki að segja tefja en þeir gerðu þetta bara mjög vel. Við náðum engum takti. Eins og þú kannski heyrir þá vil ég frekar eyða tíma í að hrósa þeim heldur en að lasta okkur,“ sagði Arnar.

Halldór Smári Sigurðsson kom inn í liðið í dag eftir að hafa verið frá í dágóðan tíma vegna meiðsla. Hann skoraði jöfnunarmarkið í lokin og Arnar er feginn að fá hann inn.

„Já klárlega mikilvægt. Hann hefur farið bara undir radarinn. Er örugglega einn besti vinstri miðvörður í deildinni og við höfum saknað hans. Það var ekki planið að hann myndi spila heilan leik í dag því hann átti að spila hálfleik. Svo vorum við bara í veseni og sem betur fer vorum við einum fleiri og þetta reyndi kannski ekki eins mikið á hann varnarlega séð. Hann náði að þrauka heilan leik og bjargar stigi í restina,“ sagði Arnar og var svo spurður út í atvik á 12. mínútu þegar Halldór Smári togaði niður Alex Freyr í góðu færi og ÍBV vildi rautt spjald á hann.

„Það átti mögulega rétt á sér. Það getur vel verið að þetta hafi verið aðeins of langt frá marki og ákveðnir leikmenn komnir í góða stöðu. Ég hefði örugglega ekki kvartað mikið ef hefði verið rekinn útaf og örugglega brjálaður ef ég hefði verið þjálfari ÍBV.“

Víkingar náðu ekki að sækja stigin þrjú í dag og með sigri á morgun getur Breiðablik komist 12 stigum yfir Víkinga sem munu þó eiga leik til góða.

„Ég held að við þurfum bara að lifa af fram að landsleikjapásu. Þetta er búin að vera alveg gríðarleg törn og strákarnir búnir að sýna mikinn karakter. Við þurfum bara að fá hópinn heilann til baka. Eins og ég hef sagt áður, gefðu mér 3-5 stig (í Blika) þá eigum við möguleika en 6 stig plús er mjög erfitt. Svo veltur þetta á leiknum á morgun og ef Blikar vinna þá er þetta orðið mjög erfitt við verðum að vera heiðarlegir með það. Auðvitað gefumst við ekki upp. Fyrst og fremst þurfum við að fá hópinn okkar til baka, taka bikarúrslitaleikinn og sjá til hvað við getum fengið út úr þessum fimm leikjum sem eftir eru,“ sagði Arnar að lokum.