„Verð mjög hrærð yfir þessu öllu“

Þrátt fyrir að innan við ár sé síðan að Vanda tók við formannsembætti hefur hún þegar farið með íslenska landsliðinu á eitt stórmót, EM í Englandi í sumar, og gæti svo fagnað HM-sæti með stelpunum okkar í kvöld ef Ísland sleppur við tap gegn Hollandi.

„Ég er rosalega stolt af þeim og öllu starfsfólkinu í kring, þjálfaranum og öllu teyminu. Það eru allir að stefna í sömu átt og þetta er bara svona,“ segir Vanda og slær lófa að hjarta sér til að ítreka stoltið. „Ég syng þjóðsönginn fyrir alla leiki hástöfum og verð mjög hrærð yfir þessu öllu,“ segir Vanda en brot úr viðtali við hana má sjá hér að neðan.

Vanda á sjálf að baki 37 leiki fyrir íslenska A-landsliðið og var til að mynda fyrirliði liðsins þegar það vann Holland tvisvar í undankeppni EM 1995, þegar Ísland endaði í hópi átta bestu landsliða Evrópu.

„Ég spilaði minn fyrsta landsleik árið 1985 þannig að þetta er orðið langur tími sem maður hefur fylgt þessu eftir. Stundum verður maður alveg orðlaus yfir breytingunum og því hvert við erum komin,“ segir Vanda.

Skoðaði liðin sem náð höfðu langt og bauð Þorsteini langan samning

Hún er ánægð með þróun íslenska landsliðsins síðustu misseri og sú ánægja endurspeglaðist í nýjum samningi við landsliðsþjálfarann Þorstein Halldórsson. Samningurinn er nokkuð langur, eða til ársins 2026, með möguleika á framlengingu fram yfir HM 2027.

„Ég horfði aðeins í kringum mig og skoðaði liðin sem hafa verið að ná góðum árangri í gegnum tíðina. Eitt af einkennunum var að þjálfarinn var í langan tíma. Ég var mjög ánægð með Steina og hann hafði líka sýnt það með Breiðabliki að hann var góður í langan tíma. Það eru ekkert allir þjálfarar þannig. Við, ég og stjórn KSÍ, vildum sýna þetta traust sem við höfum á honum,“ segir Vanda og bætir við að ekki hafi þurft að sannfæra Þorstein neitt um að halda áfram:

„Nei. Ég held að hann sé alveg á sömu línu. Við erum með mjög skemmtilegt og efnilegt lið, og ég sé fram á bjarta tíma á næstu árum, þegar þær safna fleiri og fleiri leikjum í reynslubankann. Ég held að við séum líka á þeim stað að það sé gott að vera með stöðugleika.“

Ísland mætir Hollandi í Utrecht í kvöld, klukkan 18:45 að íslenskum tíma, í úrslitaleik um öruggt sæti á HM. Tapi Ísland fer liðið í umspil í október. Vísir er á staðnum og flytur fréttir í allan dag af stelpunum okkar.