Úr­slita­leikur Sam­bands­deildarinnar vin­sælli en úr­slita­leikur Evrópu­deildarinnar

Eintracht Frankfurt vann Evrópudeildina eftir sigur á Rangers í vítaspyrnukeppni í úrslitaleiknum á meðan Roma vann Sambandsdeildina eftir 1-0 sigur á Feyenoord í úrslitaleik. Leikirnir tveir fóru fram með viku millibili en Ceferin segir að meiri athygli hafi verið að úrslitaleik Sambandsdeildarinnar en úrslitaleik Evrópudeildarinnar.

„Úrslitaleikurinn sem Roma vann á síðasta tímabili var vinsælli en úrslitaleikur Evrópudeildarinnar,“ sagði Aleksander Ceferin, forseti UEFA. 

Evrópudeildunum þrem má skipta upp í A, B og C deildir. Meistaradeildin (A) inniheldur öll bestu lið Evrópu á meðan Evrópudeildin (B) tekur inn öll næst bestu lið Evrópu. Í Sambandsdeildinni (C) keppa svo næstu lið fyrir neðan Evrópudeildina.

„Ég er mjög hamingjusamur yfir því hvernig Sambandsdeildin og þjóðadeildin eru að þróast,“ sagði Ceferin á þingi alþjóðlega íþróttafréttamanna AIPS og USSI. 

„Það voru margir sem gagnrýndu Sambandsdeildina í upphafi en sömu aðilar vilja nú hýsa keppnina á stærri keppnisvöllum,“ bætti Ceferin við.