Sláandi og sorglegt að sjá hatur framsett á sakleysislegan hátt í barnaefni

Myndbandið sem um ræðir hefur vakið talsverða athygli á undanförnum dögum. Það byrjar á því að ung stúlka færir móður sinni teiknaða mynd af fjölskyldu sinni og talar um teikningu bekkjarfélaga. 

„Kata teiknaði tvær mömmur, hún segir að þær séu hjón. Kennarinn segir að aðalatriðið sé að fólk elski hvort annað og sé hamingjusamt,“ segir unga stúlkan við móður sína í myndbandinu. 

„Veistu, margir hafa sínar eigin skoðanir á því hvað sé rétt og rangt en aðalatriðið er hvað Jehóva finnst,“ svarar móðirin. 

Fólk úr ýmsum áttum hefur gagnrýnt myndbandið harðlega. 

„Pælið í þessu hér. Það er bara fólk þarna úti sem finnst þetta bara vera í fína lagi. Gerum þetta bara nógu dúllulegt, miðum á börn og þá er þetta ekki hatursorðræða heldur fróðleikur. Alveg galið,“ segir til að mynda tónlistarmaðurinn Baldur Ragnarsson í Skálmöld.

„„Vottafuck” segi ég nú bara!,“ segir sundkappinn Már Gunnarsson. 

„Ég vona svo sannarlega að þetta myndband verði til þess að þessi söfnuður verði tekinn af fjárhagsstyrkjum og að peningurinn fari í eitthvað uppbyggilegt - Allt annað en að borga framleiðslu á svona heilaþvottastarfsemi!“

Augljós hatursorðræða stíluð að börnum

Hinseginleikinn vakti meðal annars athygli á myndbandinu. Ingileif Friðriksdóttir, stofnandi Hinseginleikans, segir að sér hafi verið verulega brugðið þegar hún sá myndbandið í gær.

„Þarna er hatur framsett á einhvern veginn mjög sakleysislegan hátt í barnaefni og matreitt ofan í börnin. Þetta er eitthvað sem þeim er kennt augljóslega í þessum trúarhópi og það er svolítið sláandi að sjá svona rosalega augljósa hatursorðræðu setta fram á þennan hátt og stílað að litlum börnum,“ segir Ingileif.

Sjálf er Ingileif gift Maríu Rut Kristinsdóttur, sem stofnaði einnig Hinseginleikann með Ingileif, og eiga þær tvo stráka. Það sé sláandi að vita til þess að börn hinsegin foreldra þurfi hugsanlega að sitja undir hatri frá jafnöldrum sínum út af einhverju eins og þessu. 

„Mér finnst bara sorglegt að vita til þess að það er hópur af börnum í okkar samfélagi sem hefur verið sýnt svona efni og fer svo með þessar ranghugmyndir út í sitt nærumhverfi, í skólann og til vina eða í kringum önnur börn,“ segir Ingileif.

Sýnt innan Votta Jehóva í mörg ár

Vísir birti myndbandið í gær en Ingileif segist hafa komist að því í dag að myndbandið hafi verið í dreifingu um árabil. Ein sem hún hafi rætt við hafi gengið úr söfnuðinum fyrir mörgum árum. Henni hafi verið sýnt myndbandið á sínum tíma. 

Að sögn Ingileifar er það ekki leyndarmál hvernig Vottar Jehóva líta á hinsegin fólk. Því komi ekki sérstaklega á óvart hvernig þau tali um þau. 

„En að búa til og framleiða sérstakt efni beint að börnum sem er svona hatursfullt og gert í rauninni einungis til að skapa fordóma hjá litlum börnum, ég hef ekki séð þetta áður og þess vegna einmitt er það kannski svona sérstaklega sláandi að horfa á þetta myndband,“ segir Ingileif. 

„Maður veltir fyrir sér hverjum dettur í hug að setja peninga í svona framleiðslu, þetta er talsett og það er einhvern veginn gegnið mjög langt með þetta án þess að þetta sé stöðvað neins staðar,“ segir hún enn fremur. 

Í myndbandinu er einnig talað um að fólk geti breytt sér til að komast inn í „paradís“. Ingileif segir það fjarri sannleikanum. 

„Við erum bara fædd eins og við erum og við getum ekkert breytt því, en það sem að svona lagað mun gera er hins vegar að leiða til þess að börn sem eru innan safnaðarins og eru hinsegin munu þurfa að upplifa mikla skömm frá sínu umhverfi og aldrei kannski þora að vera þau sjálf,“ segir Ingileif. 

Alvarlegt að trúfélag sem fái ríkisstyrki spúi hatri

Þá telur hún að taka megi umræðuna um að trúfélög sem ríkið styrki í formi sóknargjalda þurfi að fylgja lögum landsins og ekki dreifa hatursáróðri. 

„Rætt hvernig er hægt að setja því hömlur að félag, sem við sem samfélag erum í rauninni að styrkja, geti ekki verið að dreifa hatri í nafni trúfrelsis. Þó svo að það sé trúfelsi í landinu þá á fólk að fá að lifa sínu lífi án þess að óttast hatursorðræðu og það eru líka auðvitað bara lög og reglur sem eiga við þar,“ segir Ingileif.

Rætt var við fyrrverandi meðlimi Vottanna sem lýstu gífurlegu andlegu ofbeldi í Kompás fyrr á árinu en þáttinn má finna í spilaranum hér fyrir neðan.

Hvort að umræðan sem nú sé að skapast um myndbandið og Votta Jehóva muni hafa einhver áhrif og myndbandið verði tekið niður segist hún ekki sérstaklega bjartsýn. 

„Ég ætla ekki að gera mér neinar væntingar um það en ég held að það megi alveg setja spurningamerki við það hvort að félög sem eru að fá ríkisstyrki fái að básúna hatri án þess að gerð sé athugasemd við það,“ segir Ingileif.

Þó það sé mögulega lítið hægt að gera til að sporna gegn orðræðunni innan félagsins segir Ingileif mikilvægt að allir séu meðvitaðir um það að hinsegin fólk sé úti í öllum hópum samfélagsins sem standi með hvort öðru. 

„Ég held að það sé bara mjög mikilvægt að við tölum um þetta, tökum þessa umræðu og reynum að upplýsa fólk af því að fordómar byggjast á fáfræði en því meira sem við erum hávær og tölum og hrópum þá vonandi náum við að uppræta að minnsta kosti einhverja af þeim fordómum sem hefur þegar verið haldið uppi með svona löguðu,“ segir Ingileif.

Viðbrögð frá öðrum einstaklingum við myndbandinu á samfélagsmiðlum má finna hér fyrir neðan.