Bólusetja gegn kórónuveirunni með munnúða

Íbúar Sjanghæ eru fyrstir í röðinni og til að byrja með er bóluefnið notað sem örvunarskammtur fyrir þá sem áður hafa verið bólusettir á hefðbundinn hátt.

Í umfjöllun AP fréttaveitunnar um málið segir að einnig séu bundnar vonir við að þessi nýja aðferð verði til þess að þeir sem óttist sprautur láti bólusetja sig auk þess sem aðferðin er sögð henta afar vel í vanþróaðri löndum heimsins þar sem ekki þarf mikla þjálfun til að gefa efnið.

Bólusetningar gegn kórónuveirunni hafa ekki verið gerðar að skyldu í Kína þrátt fyrir gríðarlega harðar aðgerðir en mikil áhersla er nú lögð á að fjölga þeim sem fengið hafa örvunarskammt áður en hægt er að aflétta takmörkunum vegna faraldursins.