Sólveig Anna fullviss um að ná fram kröfum Eflingar

Ríflega áttatíu manna samninganefnd Eflingar marseraði undir slagorðaborðum á fyrsta samningafundinn með Samtökum atvinnulífsins undir stjórn ríkissáttasemjara í dag. Fundurinn stóð í um níutíu mínútur og hefur annar fundur verið boðaður á fimmtudag í næstu viku.

Framkvæmdastjóri Samtaka atvinnulífsins var jákvæður um gang viðræðna að fundi loknum.

„Ég held að hann hafi skilað heilmiklu. Við fórum í raun yfir kjarasamninginn sem við höfum gert við Starfsgreinasambandið í heild sinni. Settum hann í samhengi við eflingarfólk. Markmið okkar er að ná kjarasamningi hratt og örugglega og við ítrekuðum það hér í dag við samninganefnd Eflingar,“ segir Halldór Benjamín.

Sólveig Anna Jónsdóttir formaður Eflingar segir hennar fólk til í aðgerðir náist ekki samningar um kröfur félagsins.

Ertu vongóð um að þið náið fram einhverju meiru en aðrir samningar hafa sýnt?

„Ég er náttúrlega að sjálfsögðu ekki bara vongóð um það heldur er ég fullviss um það.“

Fundurinn hafi farið í kynningu SA á samningum við Starfsgreinasambandið og önnur stéttarfélög.

„Því er haldið fram að þetta sé einhvers konar framhald af lífkjarasamningnum. Það er einfaldlega ósatt. Þarna hefur verið samið þannig að þau sem minnst hafa fá minnst og þau sem mest hafa fá mest. Sem er alger andstæða lífskjarasamningsins,“ segir Sólveig Anna.

Halldór Benjamín segir SA vilja semja við Eflingu á grunni nýgerðra samninga sem félög áttatíu þúsund manns á vinnimarkaði hafi skrifað undir. En auðvitað væru allir samningar aðlagaðir að hverjum og einum viðsemjenda þótt ramminn væri skýr.

Frétt Stöðvar 2 má sjá að neðan.

„Ég fullyrði að SGS samningurinn er settur upp með þeim hætti að hann skilar verulegri kaupmáttaraukningu á lægsta enda tekjudreifingarinnar,“ segir framkvæmdastjóri SA. Samningurinn við SGS næði til sömu starfa og hjá félögum Eflingar.

Sólveig Anna telur ekki miklar líkur á að samningar takist fyrir jól. Enda næsti fundur boðaður daginn fyrir Þorláksmessu.

„Ekki nema einhver stórkostlegur árangur náist þá. Samtök atvinnulífsins fallist á röksemdarfærslu okkar um að okkur hentar ekki samningurinn sem gerður hefur verið við starfsgreinasambandið. Við þurfum að fá betri samning, við þurfum meiri hækkanir,“ segir formaður Eflingar.

Krafan um 56.700 króna hækkun allra launa auk 15 þúsund króna framfærsluuppbótar standi.

„Til að mæta þeirri staðreynd að heimili láglaunafólks eru rekin með viðvarandi halla,“ segir Sólveig Anna Jónsdóttir.