Salzburg og Shakhtar með yfirhöndina en jafnt hjá Ajax og Union Berlin

Nicolas Capaldo skoraði eina mark leiksins á 88. mínútu þegar Salzburg vann 1-0 sigur gegn José Mourinho og lærisveinum hans í Roma í kvöld og Rómverjar hafa því verk að vinna á heimavelli að viku liðinni.

Sömu sögu er að segja um franska liðið Rennes sem mátti þola 2-1 tap gegn úkraínska liðinu Shakhtar Donetsk. Dmytro Kryskiv og Artem Bondarenko sáu um markaskorun Shakhtar Donetsk í fyrri hálfleik áður en Karl Toko Ekambi minnkaði muninn um miðjann síðari hálfleik.

Ajax og Union Berlin eru hins vegar enn á byrjunarreit eftir markalaust jafntefli liðanna í Hollandi á sama tíma.

Þá var einnig leikið í Sambandsdeildinni á sama tíma. Fiorentina vann öruggan 4-0 útisigur gegn SC Braga, Qarabag vann 1-0 sigur gegn Gent og Trabzonspor vann 1-0 sigur gegn Basel. Bodö/Glimt og Lech Poznan gerðu hins vegar markalaust jafntefli.