Þrjár íslenskar CrossFit konur á topp tuttugu í Evrópu: Þessi komust áfram

Keppendur kláruðu þrjár vikur í opna hlutanum en nú þarf íþróttafólkið að glíma við æfingar á styttri tíma því það sem tekur við núna er þriggja daga keppni í næsta hluta.

Eftir að úrslitin úr opna hlutanum voru staðfest þá fengu þau sem náðu lágmörkunum þátttökutilkynningu í næsta hluta sem um leið staðfestir viðkomandi í hóp tíu prósent af besta CrossFit fólki heims. Það er því ekki auðvelt að komast áfram úr The Open.

Íslenska fólkið fer í gegnum undankeppni Evrópu og næst á dagskrá er síðan fjórðungsúrslitin sem er líka keppni í gegnum netið og hefst strax eftir aðeins þrjá daga. Keppendur gera þá fimm æfingar á þremur dögum.

Sólveig Sigurðardóttir náði bestum árangri íslensku stelpnanna á The Open í ár en hún endaði í níunda sæti í Evrópu. Á undan henni voru tvær spænskar stelpur, og svo ein frá Ítalíu, Póllandi, Belgíu, Írlandi, Frakklandi og Noregi.

Evrópumeistarinn á The Open í ár varð Elena Carratala Sanahuja frá Spáni en hún endaði á undan Elisu Fuliano frá Ítalúu og Gabrielu Migala frá Póllandi.

Ísland átti alls þrjár CrossFit konur á topp tuttugu í Evrópu en Anníe Mist Þórisdóttir endaði í sextánda sæti og Þuríður Erla Helgadóttir varð nítjánda.

Engin önnur náði inn á topp fimmtíu en Sara Sigmundsdóttir endaði í 58. sæti í Evrópu. Katrín Tanja Davíðsdóttir hefði reyndar endað í 28. sætinu væri hún skráð sem Íslendingur í keppninni en hún keppir fyrir Bandaríkin á þessu tímabili.

Katrín Tanja endaði í 95. sæti í heiminum en varð í 21. sæti í Vesturhluta Norður-Ameríkukeppninnar þar sem leið hennar liggur inn á heimsleikanna í ár.

Björgvin Karl Guðmundsson endaði í tólfta sæti í The Open í Evrópu en hann varð í 45. sæti á heimsvísu. Evrópumeistarinn varð Reggie Fasa frá Bretlandi en hann varð á undan þeim Aniol Ekai frá Spáni og Alex Kotoulas frá Grikklandi.

Ísland á annars fjölda keppenda í fjórðungsúrslitunum en þangað komust 6015 efstu karlarnir og 3999 efstu konurnar í Evrópu.

Alls komust 69 íslenskar konur og 65 íslenskir karlar áfram í næsta hluta undankeppni heimsleikanna.

Samkvæmt úrslitasíðu CrossFit samtakanna hafa því þessir Íslendingar komist áfram: