Eyjakonur gáfu út tuttugu síðna leikskrá fyrir bikarúrslitin

Fyrri leikur kvöldsins er leikur Hauka og Vals sem hefst klukkan 18.00. Seinni leikurinn er síðan á milli ÍBV og Selfoss og hefst hann klukkan 20.15.

ÍBV og Valur eru sigurstranglegri í þessum leikjum enda tvö langefstu lið Olís deildarinnar.

Eyjakonur mæta Selfossi í Suðurlandsslag en ÍBV liðið hefur unnið sextán leiki í röð í deild (14) og bikar (2) eða alla leiki sína frá og með 20. október.

Selfosskonur eru sex sætum neðar í töflunni og ÍBV vann síðasta leik liðanna með 21 marki, 40-21, en hann fór fram á Selfossi í janúar.

ÍBV hefur ekki komist í bikarúrslitaleikinn í ellefu ár (síðast 2012) og varð síðast bikarmeistari árið 2004 (35-32 sigur á Haukum). Selfosskonur hafa aldrei komist í bikarsúrslitaleik en síðast átti félag lið í úrslitaleiknum árið 1993 þegar karlarnir komust þangað í fyrsta og eina skiptið.

Fyrri leikur kvöldsins er á milli frændliðanna Vals og Hauka. Valskonur hafa náð í tuttugu fleiri stig í deildinni í vetur og eru fjórum sætum ofar. Valsliðið hefur unnið alla þrjá innbyrðis leiki liðanna í deildinni á þessari leiktíð en þann síðasta í febrúar þó aðeins með einu marki, 27-26.

Í raun hefur munurinn alltaf minnkað með hverjum leik. Valur vann fyrsta leikinn með fimmtán mörkum í september (37-22), þá með átta mörkum (34-26) í nóvemberlok og loks með einu marki á heimavelli (27-26) fyrir rúmum mánuði.

Valskonur eru ríkjandi bikarmeistarar og hafa unnið hann alls átta sinnum þar af tvisvar á síðustu fjórum árum. Haukakonur komust síðast í bikarúrslitaleikinn árið 2018 og unnu bikarinn síðast árið 2007 þá í fjórða skiptið.

Eyjakonur gáfu út tuttugu síðna leikskrá fyrir bikarúrslitin þar sem má meðal annars finna viðtal við fyrirliðann Sunnu Jónsdóttur, markvörðinn Mörtu Wawrzynkowsku og Vigdísi Sigurðardóttur sem er fyrrum tvöfaldur bikarmeistari með ÍBV. Það er hægt að nálgast hana hér.

Haukar hituðu líka upp fyrir bikarúrslitin á Youtube síðu sinni en þáttinn má finna hér fyrir neðan.