Freyr ætlar sér að þjálfa landsliðið síðar en ekkert heyrt frá KSÍ

Freyr er einn þeirra sem íslenskir fjölmiðlar hafa helst nefnt sem mögulega kandídata í starfið en hann er í dag þjálfari danska úrvalsdeildarfélagsins Lyngby og kveðst einbeita sér að því.

Freyr var aðstoðarþjálfari Eriks Hamrén hjá karlalandsliðinu í tvö ár og áður leikgreinandi fyrir liðið og þjálfari kvennalandsliðsins. Áður en að þáverandi formaður KSÍ, Guðni Bergsson, valdi Arnar Þór Viðarsson til að taka við af Hamrén í lok árs 2020 hafði Freyr verið áhugasamur um að taka við starfinu og virtist ánægja hafa ríkt meðal leikmanna með hans störf.

„Á einhverjum tímapunkti verð ég landsliðsþjálfari Íslands,“ segir Freyr í viðtali við danska miðilinn Bold.dk sem birtist í gær.

„Í augnablikinu er þetta ekki eitthvað sem ég er að velta fyrir mér og ég hef ekkert heyrt frá íslenska sambandinu, og ég einbeiti mér að Lyngby,“ segir Freyr.

„Ég starfaði lengi hjá sambandinu og þar er ég öllum hnútum kunnugur. Ég veit vel hvað þarf til og að ég myndi passa vel fyrir þau, og það vita þau líka vel. Þau hafa fjárfest í mér og gefið mér stór tækifæri og hlutverk í gegnum tíðina.

Ég hef sagt þeim áður að ég muni snúa aftur einhvern tímann, og ég hlakka til þess dags, en sá dagur er ekki núna,“ segir Freyr.