Rændi banka til að fjár­magna kvik­mynd

Nacoe Ray Brown játaði brotið fyrir dómi í janúar síðastliðnum. Brown, sem er 55 ára gamall, hafði sett derhúfu, sólgleraugu og sóttvarnargrímu á sig til að fela andlitið er hann rændi bankann. Brown rétti starfsmanni bankans miða sem á stóð að hann væri með byssu og væri að krefjast penings. Starfsmaðurinn rétti honum í kjölfarið tæplega 4.300 dollara í seðlum, sem gera rúmlega hálfa milljón í íslenskum krónum.

Samkvæmt umfjöllun Insider um málið náði lögreglan að hafa uppi á Brown eftir ábendingu frá vitni sem sá hann fara á bensínstöð og skipta um föt. Fljótlega fann lögreglan Brown á hóteli og handtók hann. Brown var ekki vopnaður á hótelinu og lögreglan fann ekkert skotvopn í tengslum við málið.

Þegar Brown var handtekinn tjáði hann yfirvöldum að hann væri að taka upp kvikmynd í Flórída og að peningurinn væri á þrotum. Hann hafi rænt bankann til að geta klárað kvikmyndina. Þetta var ekki í fyrsta skipti sem Brown rænir banka en hann gerði það þrisvar sinnum árið 2001. Hann var dæmdur í 25 ára fangelsi fyrir þau rán en fékk að fara úr fangelsinu árið 2020 á skilorði.