Áfrýjuninni hafnað og bann Mitrovic verður ekki lengt

Mitrovic hefur nú þegar setið af sér þrjá leiki af þeim átta sem hann þarf að taka út, en hann var dæmdur í átta leikja bann fyrir að ýta dómaranum Chris Kavanagh í bikarleik gegn Manchester United.

Framherjinn fékk þriggja leikja bann fyrir að fá beint rautt spjald, þriggja leikja bann fyrir að ýta dómaranum og tveggja leikja bann fyrir ógnandi tilburði.

Hann mun geta snúið aftur á völlinn í ensku úrvalsdeildinni þann 13. maí næstkomandi þegar Fulham á þrjá leiki eftir af tímabilinu.

Þjálfari liðsins, Marco Silva, fékk einnig tveggja leikja bann fyrir að fá beint rautt spjald í sama leik og hafði enska knattspyrnusambandið farið fram á að hann myndi einnig fá lengra bann. Þeirri beiðni var einnig hafnað og Silva getur því snúið aftur á hliðarlínuna í næsta deildarleik Fulham gegn Leeds á morgun.