Bleikjuveiðin búin að vera fín við Ásgarð

Það hefur yfirleitt verið fín bleikjuveiði í Soginu þó hún hafa verið misjöfn á milli ára en eftir að sleppuskylda var sett á, þá sérstaklega Ásgarðsmegin, eru sífellt stærri bleikjur að veiðast. Apríl er búin að vera veiðimönnum ágætur en alls hafa veiðst 152 bleikjur í Ásgarði þar af níu í gær og þrettán í fyrradag. Það var algengt hér á árum áður að fá tveggja til þriggja punda bleikjur en þær voru ekkert margar yfir það. Undirritaður fékk þó einu sinni sjö punda bleikju við Frúarstein fyrir löngu og var það langstærsta bleikjan úr ánni það sumar. 

Staðan í dag er bara þannig að fjögura og fimm punda bleikjur eru bara nokkuð algengar og þær sjást alveg stærri. Þetta er eitt af þeim svæðum þar sem það sést svo greinilega hvað V&S gerir viðkvæmum stofnum í ánni. Ekki nóg með það að fiskurinn fær þá tækifæri til að hrygna en líka að stækka. Það verður líklega ekki langt í að þessi stóra sjö punda verði bara daglegt brauð á þessu svæði.