Eyjólfur Árni vill halda á­fram sem formaður SA

Í þrjátíu ár hefur Eyjólfur sinnt stjórnunarstörfum í íslensku atvinnulífi en hann er byggingarverkfræðingur að mennt. Hann var forstjóri Mannvits hf. og forvera þess félags í tólf ár til ársloka 2015. Hann hefur verið í stjórn SA frá 2014 og í framkvæmdastjórn frá 2016. Þá hefur hann verið formaður síðan árið 2017.

„Þetta var harður vetur sem einkenndist af átökum og sáttaleiðum. Einstök samstaða myndaðist á meðal fyrirtækja í Samtökum atvinnulífsins þegar óvíst var hvort átök á vinnumarkaði myndu hafa lamandi áhrif á samfélagið. Það er meðal annars sú mikla samstaða sem gerir þetta starf skemmtilegt og gefandi, en verkefnin framundan eru ærin og fjölbreytt. Það er mér því sannur heiður að gefa áfram kost á mér sem formaður Samtaka atvinnulífsins,“ er haft eftir Eyjólfi í tilkynningu. 

Rafræn kosning til formanns hefst þriðjudaginn 2. maí og lýkur klukkan tíu þann 16. maí þegar aðalfundur samtakanna fer fram.