Urðu Ís­lands­meistarar þegar þeir slógu Haukana síðast út

Bið Aftureldingar er næstum því aldarfjórðungur á lengd (1999) en FH-ingar hafa beðið í tólf ár (2011). Það er mun styttra í titla Hauka (2016) og ÍBV (2018).

Afturelding er með heimavallarréttinn í undanúrslitaeinvígi sínu á móti Haukum og er fyrsti leikurinn í Mosfellsbænum í kvöld. Leikurinn hefst klukkan 19.30 og er leikurinn sýndur beint á Stöð 2 Sport. Upphitun fyrir leikinn hefst klukkan 19.00.

Það er óhætt að segja að úrslitin í einvígum Hauka og Aftureldingar hafa verið einhliða síðustu rúmu tvo áratugi.

Haukarnir hafa unnið síðustu fjórar seríur á móti Aftureldingu í úrslitakeppni karla eða í öll skiptin sem félögin hafa lent á móti hvoru öðru á þessari öld.

Það þarf að fara 24 ár aftur í tímann til að finna seríu þar sem Afturelding hafði betur á móti Haukum en það var í aprílmánuði 1999.

Vorið 1999 var líka þegar Afturelding varð síðast Íslandsmeistari.

Afturelding sló þá Haukana út í undanúrslitunum 2-1 eftir átta marka sigur í oddaleik að Varmá, 30-22. Bjarki Sigurðsson skoraði 11 mörk fyrir Aftureldingaliðið í leiknum. Í úrslitaeinvíginu vann Afturelding síðan 3-1 sigur á FH.

Haukarnir hafa síðan unnið öll einvígi félaganna. Haukar unnu 2-1 í undanúrslitum 2000, 3-0 í undanúrslitum 2015 og 3-2 í úrslitaeinvíginu 2016. Haukar höfðu einnig betur í átta liða úrslitum 2021 en þá fóru fram tveir leikir og Haukarnir unnu með 24 mörkum samanlagt (71-47).

Liðin mættust tvisvar í deildarkeppninni í vetur og unnust báðir leikirnir á útivelli. Afturelding vann eins marks sigur á Ásvöllum í október (27-26) og Haukarnir unnu tveggja marka sigur á Varmá í febrúar (26-24). Stærsti leikur þeirra var þó sjálfur bikarúrslitaleikurinn þar sem Afturelding vann eins marks sigur í Laugardalshöllinni, 28-27.