Allra augu á Mercedes fyrir komandi helgi

Búist er við mikið upp­færðum Mercedes bíl við fyrstu æfingar komandi keppnis­helgar á I­mola á föstu­daginn.

Eftir afar dapra byrjun, þar sem Mercedes hefur verið ljós­árum á eftir Red Bull Ra­cing, standa vonir til þess að þýski risinn muni geta slegið frá sér eftir því sem líður á tímabilið.

Það var í byrjun tíma­bils, eftir fyrstu keppnis­helgina í Bar­ein, sem for­ráða­menn Mercedes áttuðu sig á því að stór mis­tök höfðu verið gerð í þróun keppnis­bíls liðsins. Mercedes hafði í stórum dráttum haldið sig við sömu hönnun og tíma­bilið á undan.

Þetta rót­gróna þýska For­múlu 1 lið, sem hafði ráðið lögum og lofum í For­múlu 1 átta ár í röð í heimsmeistarakeppni bíla­smiða fyrir sigur Red Bull Ra­cing á síðasta tíma­bili, hefur þurft að grafa djúpt í reynslu­bankann undan­farið.

„Ef við horfum alveg aftur til prófana og keppnis­helgarinnar í Bar­ein í upp­hafi tíma­bils, þá var það þá sem við áttuðum okkur á því að við værum með bíl í höndunum sem myndi ekki geta fært okkur heims­meistara­titil,“ sagði Andrew Shovlin, verk­fræði­stjóri Mercedes í sam­tali við Sky Sports.

Liðið hafi ekki getað sætt sig við þá veg­ferð og því hafi þurft að grípa til dra­stískra aðgerða.

„Við þurftum að hugsa upp á nýtt grund­vallar hluti í bílnum og það sem við mætum með til leiks á I­mola er fyrsti vísirinn af þeirri vinnu.“