Al­­menningur getur nú vaktað skipu­lags­­mál í nær­um­hverfi sínu

Skipulagsstofnun hefur haft umsjón með þróun og uppsetningu gáttarinnar sem var opnuð sveitarfélögum og svæðisskipulagsnefndum 1. maí.  Frá 1. júní verða mál allra sveitarfélaga unnin og kynnt í gáttinni.

„Til þessa og í dag erum við að kynna öll þau mál í öllum þeim sveitarfélögum sem eru að vinna með skipulag í dag inni á þeirra heimasíðum. En með Skipulagsgáttinni þá fara núna öll mál, öll svæðis-, aðal-, og deiliskipulög og breytingar á þeim, umhverfismat og framkvæmdaleyfi á einn stað þegar það kemur að kynningu þessara mála. Skipulagsgáttin er samráðsgátt og gagnagátt fyrir þennan málaflokk núna þar sem fólk getur skoðað og gert athugasemdir við það í gegnum gáttina,“ segir Ólafur. 

Gáttin sé risastórt skref í stafrænni þjónustu á sviði skipulagsmála.

Hægt að vakta ákveðin hverfi

Með tilkomu Samráðsgáttarinnar getur fólk vaktað mál í sínu nærumhverfi eða því svæði eða málaflokki sem það hefur áhuga á. Forstjóri Skipulagsstofnunar telur að gáttin muni koma til með að einfalda hluti fyrir almenning og auka yfirsýn.

„Þú getur farið inn á gáttina og stofnað þá vöktun sem þér hentar og þú færð þá tilkynningar um mál þegar þau berast í kynningu. Það er einnig hægt að vakta mál og fylgjast með framvindu mála frá því að þau hefjast til dæmis með skipulagslýsingu og þangað til að þau eru samþykkt endanlega,“ segir Ólafur sem telur að gáttin komi til með að einfalda hluti fyrir almenning í frekar flóknum málaflokki.

„Þetta eykur verulega yfirsýn, þú sérð allar athugasemdir sem hafa verið gerðar hafa verið, af umsagnaraðilum eða almenningi í þessum málum. Öll gögnin eru á einum stað.“

Ekki í mínum bakgarði

Skipulagsmál geta verið afar umdeild. Sem dæmi má nefna úrræði fyrir heimilislausa eða virkjanaframkvæmdir þar sem fólk er fylgjandi breytingum svo framarlega sem þær verða ekki í þeirra eigin bakgarði. Þá er oft vísað til fyrirbærisins NIMBY-isma, sem stendur fyrir „Not in my back yard“. 

„Ég held að það sé af hinu góða að við séum meðvituð um það sem er að gerast í skipulagsmálum og umhverfismati almennt. Við erum í gegnum þetta stjórntæki að sjálfsögðu að móta byggðina til framtíðar. Þannig að það að almenningur taki meira þátt er verulega gott.  Ég óttast ekki nimby-isma með þessu og tel að með þessu móti geti fólk haldið áfram en með auðveldari hætti að reyna hafa áhrif á það sem er að gerast í þeirra nærumhverfi,“ segir Ólafur. 

Komi ekki í stað starfsfólks

Aðspurður hvort að Skipulagsgáttin komi til með að hjálpa sveitarfélögum við vinnslu á skipulagsmálum svarar Ólafur játandi. „Það er eitt af okkar markmiðum. Skipulagsgáttin er unnin fyrir sveitarfélögin, starfsmenn þeirra, sem eru með mjög mörg mál í gangi. Þetta á að hjálpa þeim að halda utan um gögn og mál. Þannig ég vona að þetta muni spara verulega vinnu hjá þeim.“  

Skipulagsgáttin komi þó ekki í stað starfsfólks. „Við þurfum enn þá fólk til að vinna í skipulagsmálum, móta land og byggð og borgir og allt það sem í kringum okkur er. Ég held að þetta sé fyrst og fremst til þess að koma meira fólki að í þessari vinnu, almenningi og hagsmunaaðilum,“ segir Ólafur.