Lést vegna vandræða við fæðingu

Greint var frá andláti Bowie í síðasta mánuði en hún lést á heimili sínu í Flórída, 32 ára að aldri. Samkvæmt krufningarskýrslu er talið að Bowie hafi verið komin átta mánuði á leið og í fæðingu þegar hún lést.

Bowie varð meðal annars ólympíumeistari í Ríó 2016, í 4x100 metra boðhlaupi, og vann þar silfur í 100 metra hlaupi og brons í 200 metra hlaupi.

Umboðsmaður hennar sagði í samtali við CBS að vangaveltur um dánarorsök Bowie hefðu verið afar særandi.

„Því miður þá var margt fólk, og þar á meðal fjölmiðlar, með vangaveltur um að hún hefði gert sjálfri sér eitthvað, sem er mjög særandi. Núna þegar sannleikurinn liggur fyrir munu vonandi margir biðjast afsökunar,“ sagði Holland.