„Mjög svekkjandi að fá þetta leiðinda­mark á sig“

Ísland stóð sig frábærlega gegn ógnarsterku liði Portúgals á Laugardalsvelli í kvöld. Eina markið leit dagsins ljós í uppbótartíma þegar Cristiano Ronaldo skoraði í sínum 200. A-landsleik fyrir Portúgals.

„Fannst þeir ekki skapa nokkurn skapaðan hlut. Þeir ýttu okkur neðar en fannst við vera þéttir og fannst þeir aldrei vera hættulegir. Leyfðum þeim að hafa boltann fyrir framan okkur og það var ekki mikið um opnanir,“ sagði Arnór Ingvi en hann og Jóhann Berg Guðmundsson stóðu vaktina á miðju Íslands í kvöld.

Arnór Ingvi spilaði svipaða stöðu í 0-3 tapinu gegn Bosníu-Hersegóvínu í fyrsta leik undankeppninnar. Hann var spurður út í muninn á liðinu þá og nú.

„Erfitt að setja punkt á hvað er búið að breytast. Það kemur nýr maður í brúnna og menn vilja sýna sig eins og gerist þegar nýr þjálfari kemur inn.“

Erum að halda í okkar leikplan sem hann [Åge Hareide, landsliðsþjálfari] er búinn að leggja upp og menn fylgja því alveg í gegn.“

Tvær fínar frammistöður gegn Slóvakíu og Portúgal en því miður núll stig í hús.

„Heppnin þarf að fara falla okkar megin, gerist vonandi í næsta verkefni. Svekkjandi að fá núll stig í þessu verkefni. Getum tekið það úr þessu að hafa spilað tvo flotta leiki, það er eitthvað til að byggja á,“ sagði Arnór Ingvi að lokum.