Móðirin hafi myrt barnið sitt og stokkið frá borði

Mæðginin voru farþegar um borð í sænsku ferjunni Stena Spirit. Ferjan var á leið frá sænsku borginni Karlskrona og pólsku borgarinnar Gdynia þegar slysið átti sér stað.

Morten Frederiksen, meðlimur í dönsku rannsóknarnefndinni, segir í samtali við DR að eftir að nefndin fór yfir öll gögn málsins hafi legið fyrir að ekki sé um slys að ræða. Þar sem þetta hafi ekki verið slys sé málið nú komið til rannsóknar hjá lögreglunni.

Farið var af stað með miklar björgunaraðgerðir til að leita að mæðginunum í sjónum þann 29. júní síðastliðinn. Til að mynda var hætt við æfingu Atlantshafsbandalagsins vegna aðgerðanna. Þá aðstoðaði flugvél bandarísku landhelgisgæslunnar einnig við leitina ásamt nokkrum þyrlum.

Mæðginin fundust að lokum í sjónum en voru ekki með meðvitund. Þau voru bæði úrskurðuð látin í kjölfarið.

Rannsaka nú málið sem morð

Mæðginin voru bæði pólskir ríkisborgarar. Upphaflega hóf sænska lögreglan rannsókn á málinu en pólska lögreglan kom svo inn í rannsóknina. Samkvæmt frétt DR rannsaka nú bæði sænska og pólska lögreglan málið sem morð. 

Grunur er um að móðirin hafi myrt son sinn og stokkið út í sjóinn eftir það. „Verið er að rannsaka það hvort barnið hafi verið myrt og móðirin svipt sig lífi,“ er haft eftir Grażyna Wawryniuk, talsmanni hjá skrifstofu saksóknara í pólsku borginni Gdansk.

Saksóknarinn í Svíþjóð hefur einnig opnað morðrannsókn vegna málsins en þar hefur enginn verið skráður sem grunaður. Þá hafa yfirvöld í Danmörku einnig rannsakað málið þar sem skipið er skráð í Danmörku.