Fýlupúka­fé­lag Sjálf­stæðis­flokksins snúið aftur

Fjölmargir þingmenn Sjálfstæðisflokksins hafa stigið fram síðustu daga og lýst yfir mikilli óánægju með málamiðlanir í ríkisstjórn, en segjast þó ekki vilja slíta samstarfinu við Vinstri græn og Framsókn. Sigmundur Davíð telur flokksmenn nú stíga fram fyrir ásýndina eina.

„Það virðist vera að menn hafi ákveðið að setja af stað gagnrýni en hugsanlega bara til þess að vera búnir að tikka í boxið og vera búnir að gagnrýna. Því hvað gera þeir svo? Ég er ekki viss um að þeir séu tilbúnir til að fylgja þessu eftir á neinn hátt og forsætisráðherra nánast gerir grín að þeim og segir að þetta sé þeirra vandamál sem þeir þurfi að leysa, án þess að það hafi áhrif á ríkisstjórnina,“ segir Sigmundur að ekkert heyrist í hvorki VG eða Framsókn sem líklega bíði þess að Sjálfstæðisflokkurinn leysi málið sjálfur.

Sigmundur segir þetta þó ekki í fyrsta sinn sem Sjálfstæðismenn kvarta yfir samstarfinu.

„Þetta er ekki í fyrsta sinn sem Sjálfstæðismenn lýsa óánægju sinni með þetta stjórnarsamstarf. Í fréttum á sínum tíma, fyrir Covid, var sagt frá fýlupúkafélaginu í þingflokki Sjálfstæðismanna sem kvartaði og kvartaði, en gerði aldrei neitt. Nú telja þeir greinilega tímabært að kvarta aftur, en munu þeir gera eitthvað, ég er ekki viss um það,“ segir Sigmundur og að umræðan sé samt sem áður komin af stað og fleiri farnir að taka undir.

„Þeir vita að flokkurinn veit varla hver hann er, hvaðan hann kom eða hvert hann er að fara og vilja sjá breytingar á því. Á meðan forysta flokksins sýnist mér vilja bara vera í stjórninni áfram og vonast að hlutirnir lagist af sjálfu sér, það komi aftur 20. Öldin, þeir verði aftur 40 prósent flokkur og fjórflokkakerfið komi aftur.“

Spurður hvort hann sjái nú nýjan Sjálfstæðisflokk segir Sigmundur að hann hafi oft grínast með það að flokkurinn líkist alltaf æ meir Samfylkingunni fyrir árið 2007.

„Nú hafa komið fram Sjálfstæðismenn sem lýsa sömu áhyggjum, en nú þarf ég að uppfæra, því flokkurinn er líklega orðinn meira eins og Viðreisn og Viðreisn getur vel við unað. Gamli móðurflokkurinn er orðinn Viðreisn.“

Hann segir gagnrýnina líka koma úr undarlegri átt, eins og til dæmis hvað varðar útlendingamálin.

„Flokkurinn er að gagnrýna mál, eins og útlendingamálin, sem að hann hefur leitt og allt í einu er afsökunin sú að við lentum bara í slæmum félagsskap og getum ekkert að því gert. Við vorum afvegaleiddir,“ segir Sigmundur og að flokkurinn hafi sjálfur aukið útgjöld í þeim flokki og leitt málefni útlendingamála síðasta áratuginn.

Hann segir flokkinn hafa tekið miklum breytingum síðustu ár og að margir gamlir Sjálfstæðismenn séu ekki ánægðir með það. Gagnrýnisraddir sem heyrist núna séu ekki nóg til þess að þagga niður í þeim.

„Ég sakna þess að eiga við gömlu góðu pólitíkina sem snerist um rökræðu og ágreining um grundvallarstefnumál. Umbúðamennskan er orðin allsráðandi og Sjálfstæðisflokkurinn hefur færst mjög í þá átt að vera umbúðaflokkur. Flokkur sem eltir tíðarandann frekar en að vera prinsippflokkur. Ég ætti auðvitað ekkert að vera að ráðleggja þeim frekar en Framsóknarflokknum, en hef samt verið að gera það í fjórtán ár og held því þá bara áfram núna: Hugið bara að því góða í stefnu ykkar í gegnum tíðina og fylgið því eftir.“