Okkar konum ekki spáð á pall á heims­leikunum en fá „ekki gleyma“ um­fjöllun

Heimsleikarnir hefjast hjá körlunum og konunum á fimmtudaginn og lýkur á sunnudaginn en keppni í aldursflokkum og flokkum fatlaðra hefst í dag.

Tia-Clair Toomey hefur verið heimsmeistari sex ár í röð en verður aðeins sem áhorfandi í ár þar sem hún er nýbúin að eignast sitt fyrsta barn. Hún er hins vegar ekki sú eina af topp tíu lista síðustu heimsleikum sem keppir ekki í ár.

Fimm af topp tíu ekki með

Alls eru það fimm af tíu efstu konum síðustu heimsleika sem missa af leikunum í ár. Þetta eru konurnar í fyrsta sæti (Toomey), öðru sæti (Mal O’Brien), fimmta sæti (Brooke Wells), sjöunda sæti (Kara Saunders) og níunda sæti (Haley Adams).

Sérfræðingar Morning Chalk Up hafa nú spáð vel í spilin og sett fram sína spá um hvaða þrjár konur komast á verðlaunapallinn á þessum heimsleikum.

Það eru bara tveir fyrrum heimsmeistarar að keppa í kvennaflokki í ár og þær koma báðar frá Íslandi. Katrín Tanja Davíðsdóttir er síðasta til að vinna af þeim sem heita ekki Tia-Clair Toomey og Anníe Mist Þórisdóttir varð heimsmeistari fyrir ellefu og tólf árum síðan.

Ungverja og Pólverja spáð tveimur efstu sætunum

Okkar konum er ekki spáð á verðlaunapallinn en þær fá aftur á móti báðar „ekki gleyma“ umfjöllun í spágrein vefsins.

Morning Chalk Up spáir Ungverjanum Laura Horvath sigri en hún er sú eina af verðlaunapallinum frá því í fyrra sem er með í ár og hefur unnið tvö silfur (2018 og 2021) og eitt brons (2022) á síðustu fimm heimsleikum.

Pólverjanum Gabrielu Migala er spáð öðru sætinu og hinni bandarísku Danielle Brandon er síðan spáð þriðja sætinu. Migala er með sterka Íslandstengingu því umboðsmaður hennar er Snorri Barón Jónsson.

Anníe Mist Þórisdóttir og Katrín Tanja Davíðsdóttir þyki aftur á móti það líklegar að þær fá sérumfjöllun í spánni. Hér fyrir neðan má sjá það sem sagt var um okkar konur.

Morning Chalk Up um Anníe Mist Þórisdóttur:

„Það var erfitt að setja Anníe hér frekar en í þriðja sætið en við höldum bara að Danielle Brandon hafi örlítið forskot á hana. Okkur kæmi samt ekkert mikið á óvart ef Anníe myndi endurtaka það sem hún gerði árið 2021.

Svona ef einhver gleymdi því þá kom Anníe til baka, ári eftir að hafa eignast barn, og náði þriðja sætinu á heimsleikunum 2021. Eftir að hafa hætt við þátttöku í fyrra, og keppt frekar í liðakeppninni, þá er spurning hvort hún eigi inni aðra innkomu í ár.

Hingað til þá hefur hún litið frábærlega út á árinu 2ö23 ekki síst í undanúrslitamóti Evrópu þar sem hún barðist alla helgina við Gabi Migala um fyrsta sætið. Í greinunum sjö þá endaði hún aldrei neðar en í áttunda sætinu og hún vann meira að segja Lauru Horvath í þremur af sjö greinum.

Hún er kannski orðin 33 ára en segist aldrei hafa verið í betra formi og hún er með augum á öðrum heimsmeistaratitli.“

Morning Chalk Up um Katrínu Tönju Davíðsdóttur:

„Þrátt fyrir að Davíðsdóttir hafi verið sex stigum frá því að tryggja sér sæti á heimsleikunum í fyrra þá væru það mistök að halda að hún væri búin að missa það.

Við skulum ekki gleyma því að árununum 2015 til 2021 þá varð hún í tíunda sæti eða ofar á sjö heimsleikum í röð þar af sex sinnum inn á topp fimm auk þess að verða tvisvar sinnum heimsmeistari. Alveg eins og Anníe Þórisdóttir þá er hún þekkt fyrir magnaða endurkomu. Árið 2015 varð hún heimsmeistari í fyrsta sinn eftir að hafa misst af heimsleikunum árið 2014.

Fram eftir öllu tímabilinu þá hefur hún litið út eins og sú Katrín sem búumst við að sjá, sérstaklega í undanúrslitamóti Vesturhluta Norður Ameríku þar sem munaði litlu að hún stæði uppi sem sigurvegari.

Fyrrverandi heimsmeistarar eins og Davíðsdóttir vita hvað þarf til að vinna á hæsta stigi og nú eftir að Toomey opnaði möguleika fyrir alla aðra, þá eru það keppendur eins og Katrín sem hafa meiri innri hvöt en nokkurn tímann fyrr.“