Séra Davíð Þór ráðinn tíma­bundið til Há­teigs­kirkju

Tilkynnt var um tímabundin vistaskipti sr. Davíðs Þórs á Facebook-síðu Laugarneskirkju í gærkvöldi. Þar sagði að starfsfólk og sóknarnefnd Laugarneskirkju óski honum velfarnaðar í starfi á nýjum stað.

Í samtali við Vísi segir sr. Davíð Þór að hann hafi ákveðið að þiggja tímabundna ráðningu til Háteigskirkju þar sem erfitt sé að þjóna Laugarneskirkju í hálfu starfi. Hann muni þjóna sem héraðsprestur í Reykjavíkurprófastsdæmi vestra með starfsstöð í Háteigskirkju. 

Staða prests losnaði í kirkjunni þegar sr. Eiríkur Jóhannsson var ráðinn til Hallgrímskirkju í sumar.

Sr. Davíð Þór hefur verið prestur í Laugarneskirkju frá árinu 2016 og segir að hann telji það gott fyrir sig að skipta tímabundið um umhverfi og vinna hálft starf á meðan hann stígur upp úr veikindum. Hann muni svo snúa aftur í Laugarnesið þegar hann hefur náð heilsu á ný.