Allt jafnt í markaleik á Nesinu

Það er farið að síga á seinni hluta deildakeppninnar í Lengjudeild karla. Spennan er að magnast á toppnum og eftir fyrstu fimm leikina sem fóru fram í kvöld er Afturelding aðeins með eins stigs forystu á toppi deildarinnar.

Í ár verður spiluð úrslitakeppni í Lengjudeildinni. Efsta liðið fer beint upp í Bestu deildina en liðin í 2. -5. sæti spila úrslitakeppni um hitt lausa sætið í efstu deild.

Í síðasta leik umferðarinnar í kvöld mættust Grótta og Fjölnir á Seltjarnarnesi. Sigurður Steinar Björnsson og Gabríel Hrannar Eyjólfsson komu Gróttu í 2-0 með mörkum í upphafi hvors hálfleiks. Fjölnir náði hins vegar að jafna með tveimur mörkum með skömmu millibili í síðari hálfleik.

Bjarni Gunnarsson skoraði fyrst á 69. mínútu og Bjarni Þór Hafstein jafnaði þremur mínútum síðar. Þegar aðeins þrjár mínútur voru eftir af venjulegum leiktíma fékk Fjölnir síðan víti sem Bjarni Gunnarsson skoraði úr og virtist vera að tryggja sigur Fjölnis.

Öll sagan var hins vegar ekki sögð. Þegar komið var fram í uppbótartíma jafnaði Arnar Þór Helgason metin fyrir Gróttu og tryggði þeim eitt stig.

Lokatölur 3-3 og Fjölnir er  áfram í þriðja sæti deildarinnar. Liðið er sex stigum á eftir ÍA og sjö stigum á eftir toppliði Aftureldingar. Grótta er fallið niður í 8. sæti eftir leiki kvöldsins en bæði Grindavík og Þór fóru uppfyrir Seltirninga eftir sigra í kvöld.