Ída Marín með frá­bært mark beint úr auka­­­spyrnu í Banda­ríkjunum

Ída Marín er ein af fjölmörgum íslenskum knattspyrnukonum sem hafa yfirgefið Bestu deild kvenna til þess að stunda nám í Bandaríkjunum.

Ída Marín spilar með Val hér heima en fékk ekki alltof mörg tækifæri á Hlíðarenda í sumar. Hún er aftur á móti að sýna og sanna mikilvægi sitt með liði LSU.

Ída skoraði þannig tvö mörk í 4-1 sigri LSU á Southern Mississippi í bandaríska háskólaboltanum.

Ída fékk hrós á miðlum skólans sem fögnuðu því sérstaklega að vera búin að endurheimta íslensku knattspyrnukonuna úr sumarfríi á Íslandi.

Ída kom LSU fyrst í 3-0 í leiknum með hnitmiðuðu vinstri fótar skoti úr vítateignum og innsiglaði síðan sigurinn með glæsilegu marki beint úr aukaspyrnu. Það má sjá það frábæra mark hennar hér fyrir neðan en það skoraði hún með hægri fæti. Fyrir ofan má síðan sjá hitt markið.