Gripu til varna eftir gagn­rýni á um­fjöllun sína um Taylor Swift og Kelce

Segja má að Swift sé stærsta popp­stjarna í heiminum um þessar mundir og hefur sam­band hennar við Kelce vakið mjög mikla at­hygli. Swift hefur undan­farið verið að mæta á leiki með Kansas City Chiefs og er NFL deildin að nýta sér það til hins ítrasta.

Deildin greip til varna í gær eftir að bera fór á gagn­rýni þess efnis að hún væri að ein­blína of mikið á sam­band Kelce við Swift í tengslum við um­fjöllun leikja. Gagn­rýnin kom frá í­þrótta­á­huga­fólki sem og Kelce sjálfum.

Á­horfið á leiki Kansas City Chiefs hefur aukist tölu­vert síðan sögu­sagnir um sam­band Kelce og Swift fóru á kreik Swift var sjálf á leik Chiefs gegn síðustu helgi gegn New York Jets og horfðu yfir 27 milljónir ein­stak­linga á út­sendinguna frá leiknum. Er það mesta á­horf á leik á sunnu­degi síðan að Super Bowl fór fram.

Fyrir leikinn voru sýndar aug­lýsingar um heimildar­myndina Taylor Swift: The Eras Tour þar sem popp­stjörnunni er fylgt á tón­leika­ferða­lagi sínu. Á meðan að leik stóð birtist hún yfir sau­tján sinnum í mynd í stúkunni og þá hefur NFL deildin notað hana ó­spart í því efni sem birt er á sam­fé­lags­miðla­reikningum deildarinnar.

Í yfir­lýsingu frá NFL deildinni, þar sem að hún ver nálgun sína segir:

„Fréttirnar af Taylor Swift og Tra­vis Kelce er stór menningar­leg stund í popp­sögunni. Við á­kváðum að nýta okkur það þar sem þarna mætast skemmtana­bransinn og í­þróttirnar. Við höfum séð ó­trú­legan fjölda góðra við­bragða við þessu.“

Þunga­miðjan sé enn efni bein­tengt leikjum deildarinnar.

Í hlað­varps­þætti með bróður sínum á dögunum sagði Kelce að NFL deildin væri að gera að­eins of mikið úr sam­bandi hans við Swift.

„Klár­lega að gera mikið úr þessu, sér í lagi minni stöðu en ég held líka að deildinni þyki þetta bara skemmti­legt og vilji gera góða hluti úr þessu.“