Mun ekki klippa hárið til að fá stjóra­starf

Noel-Williams dreymir um að fá að stýra liði í ensku úrvalsdeildinni en hann spilaði á sínum tíma í deildinni með Watford.  Langstærsta hluta ferils síns eyddi hann þó í neðri deildunum.

Noel-Williams ræddi útlit sitt og þá sérstaklega hárið í viðtali við breska ríkisútvarpið.

Það er þekkt í enska boltanum að blökkumenn fá ekki mörg tækifæri til að setjast í stjórastóla hjá félögunum þrátt fyrir að þeir séu stór hluti af leikmönnum deildarinnar.

Íþróttablaðamaðurinn Daniel Ogunshakin tengir við sögu Noel-Williams og þá í gengum sitt starf.

„Þú ættir að klippa dreadlokkana þína ef þú ætlar að komast eitthvað áfram á ferlinum,“ byrjar Ogunshakin að rifja upp í grein sinni.

„Þetta var fyrst sagt við mig eða eitthvað í þá áttina árið 2013 þegar ég var íþróttablaðamaður hjá öðru fyrirtæki. Á þeim tíma var ég stoltur af hárinu mínu og leit á það sem hluti af auðkenni mínu. Ég var líka á þeirri skoðun að það að hafa dreadlokka eða ekki, ætti ekki og myndi ekki hafa áhrif á það hvernig ég vinn mína vinnu,“ skrifaði Daniel Ogunshakin í grein hjá breska ríkisútvarpinu.

„Ég neitaði því að klippa þá,“ skrifaði Ogunshakin.

„Um tíma leit út fyrir að þetta skipti ekki máli og ég hélt að ég myndi fá tækifæri til að fjalla um HM í rugby árið 2015 vegna áhuga míns á íþróttinni og að ég var einn af aðalfjölmiðlamönnunum á þeim tíma. Ég fékk hins vegar ekki að fara af því að útlitið mitt þótti ekki við hæfi á svo háttvirtu móti. Ég varð því að losa mig við lokkana,“ skrifaði Ogunshakin en hélt áfram:

„Ég var niðurbrotinn en þegar ég lít til baka þá voru miklir kynþáttafordómar í gangi. Ég missti því af því að fjalla um einn af stóru íþróttaviðburðunum. Nokkrum vikum seinna þá klippti ég dreadlokkana sem ég var búinn að safna í tólf ár. Mér fannst ég hafa tapað hluta af sjálfum mér,“ skrifaði Ogunshakin.

Ogunshakin segir að minningarnar hafi komið til baka þegar hann las um fyrrum framherja í ensku úrvalsdeildinni sem fær engin tækifæri sem knattspyrnustjóri. Þar er hann að tala um Gifton Noel-Williams.

Noel-Williams er nú 43 ára gamall en lék á árum áður með Watford, Stoke og Burnley. Hann hjálpaði Watford að komst upp í ensku úrvalsdeildina um aldamótin.

„Ég elska hárið mitt og það yrði mikill sorgardagur ef ég þyrfti að klippa það,“ sagði Noel-Williams.

„Ég hef sagt það áður ef hárið þýði að ég muni aldrei verða knattspyrnustjóri þá er það í lagi. Ég mun ekki klippa hárið mitt til fá stjórastarf í ensku úrvalsdeildinni,“ sagði Noel-Williams.

Hann var liðsfélagi Jóhanns B. Guðmundssonar hjá Watford í kringum aldamótin síðustu.

Það má sjá greinina í vef breska ríkistútvarpsins þar sem er farið yfir fordóma og hversu erfitt það er fyrir dökka menn að fá tækifæri sem knattspyrnustjóri i bestu deild í heimi. Það má lesa alla greinina hér.