Ævin­týri Freyju og Frikka halda á­­fram í ævin­týra­landinu Ástralíu

Þetta er fjórða sagan í þessari ástsælu bókaseríu eftir Felix Bergsson, þar sem krakkar fá að slást í för með hugrökkum og frökkum systkinum um framandi slóðir.

Eins og í fyrri bókum leggja fræknu ferðalangarnir Freyja og Frikki upp í ævintýralega heimsreisu. Í þetta skiptið er förinni heitið hinum megin á hnöttinn en systkinin hyggjast verja jólunum með mömmu sinni í algjörri steik og skínandi sólskini í Ástralíu – landinu þar sem jólasveinarnir eru brimbrettagæjar. En fljótlega kemur babb í bátinn eins við má búast þegar Freyja og Frikki ferðast um framandi slóðir.

Felix segir alltaf jafn gaman að skrifa bækur um Freyju og Frikka og sjá þau eldast og þroskast milli ára. „Það er dásamleg tilfinning að hafa fengið að fylgja þeim í fjórum ævintýrum, allt frá því að þau fengu óvænta jólagjöf i fyrstu bókinni sem leiddi þau alla leið til Ekvador og Galapagoseyja. Ég hef notið þess í botn að skapa heiminn í kringum þau og leiða þau í ævintýri sem á löngum köflum virðast ætla að enda mjög illa. Þau eru að eldast og þroskast og ég vona að lesendur þroskist með þeim og læri af ævintýrum þeirra.“

Í nýju bókinni virðist Freyja alltaf fara öfugu megin fram úr. Henni finnst skrýtin tilhugsun að halda jólin í ókunnugu landi þar sem öllu er snúið á haus, stórhættulegar loðnar kóngulær gætu skriðið ofan í skóna þína og það er sumar en ekki vetur. Til að toppa þetta allt saman ætlar mamma að sofa í rúminu hans Siriks! Þrátt fyrir að hann hafi reynst þeim vel í Kambódíu þarna um árið treystir Freyja honum engan veginn.

Og ekki batnar ástandið þegar systkinin verða vör við grunsamlega menn sem virðast eiga eitthvað sökótt við Sirik. Þegar mamma hverfur svo skyndilega fer allt á hvolf í Ástralíu og Freyja og Frikki þurfa enn á ný að leggjast í erfiða rannsóknarvinnu til að finna hana áður en það er um seinan.

Með hverri bók og hækkandi aldri systkinanna takast þau á við nýjar og krefjandi áskoranir að sögn Felix. „Í þessari sögu eru þau orðin þrettán ára. Freyja á erfitt með skapið og skilur ekkert í sjálfri sér. Hún nær illa að snúa sólarhringnum við eftir martraðarkennt flug til Sydney og lendir stöðugt upp á kant við aðra fjölskyldumeðlimi.“ Frikki er á hina röndina að reyna að vera ákveðnari og trúa á sjálfan sig en honum reynist það erfitt og er iðulega sammála síðasta ræðumanni. „Þau þurfa svo að snúa bökum saman þegar mamma hverfur og reyna að finna hana áður en það verður of seint.“

Óhætt er að lýsa Freyju sem fjörugu ólíkindatóli og Frikki sem hæglátum bókaormi. En skyldi Felix byggja persónur á raunverulegum persónum úr lífi sínu? „Ja stórt er spurt. Þau byggja auðvitað lauslega á börnunum mínum, Guðmundi og Álfrúnu Perlu, en ég held nú samt að þau séu mjög ólík þeim. Þau eru skáldaðar persónur en í öllum skáldskap notar maður eitthvað úr eigin lífi sem maður þekkir. Það eru margir einstaklingar undir þegar maður skapar persónu í bók.“

Við gerð fjórðu bókarinnar um Freyju og Frikka sá Felix jafnvel fyrir sér að hún yrði sú síðasta. „Ég hafði ekki ætlað mér að skrifa meira að sinni en við sjáum til hvað gerist. Bækurnar fjórar hafa fengið frábærar viðtökur frá hlustendum Storytel og kannski blæs ég til fimmtu bókarinnar. Það verður þó ekki alveg strax. Fyrst langar mig að heyra hvað lesendur og hlustendur segja um Allt á hvolfi í Ástralíu.“

Þuríður Blær Jóhannsdóttir og Felix Bergsson lesa bókina saman en Felix er tengdapabbi hennar. „Ég bý náttúrulega svo vel að hafa flotta listamenn í fjölskyldunni og Blær er án efa einhver besta leikkona landsins eins og hægt er að sjá t.d. í þáttunum Heima er best í Sjónvarpi Símans. Hún er líka frábær og vinsæll lesari. Blær hefur alveg náð að gera Freyju að sinni með persónulegri og fallegri nálgun á hlutverkið. Það er algjör lykill að velgengni bókanna um Freyju og Frikka.“

Ævintýri Freyju og Frikka: Allt á hvolfi í Ástralíu kemur út 15. nóvember hjá Storytel sem hljóð- og rafbók.