Innlent

Kvikugangurinn tölu­vert stærri en talið var

Lillý Valgerður Pétursdóttir skrifar
Diskar og glös brotnuðu á heimilum í Grindavík í kvöld í stórum jarðskjálftum. Neyðarstigi var lýst í bænum og hann rýmdur.
Diskar og glös brotnuðu á heimilum í Grindavík í kvöld í stórum jarðskjálftum. Neyðarstigi var lýst í bænum og hann rýmdur. vísir/vilhelm

Jarðvísindamenn funduðu með almannavörnum um þrjúleytið í nótt. Bæði GPS gögn og gervitunglamyndir staðfesta að síðan í gærkvöldi hefur myndarlegur kvikugangur myndast og er hann töluvert stærri en talið var. Stór sprunga gæti opnast á svæðinu frá Sundhjúkagígum og áfram í gegnum Grindavík.

Ljóst er að jarðhræringarnar á Reykjanesi eru mjög stór atburður segir Elísabet Pálmadóttir náttúruvársérfræðingur hjá Veðurstofunni. Þannig sé atburðurinn miklu stærri heldur en áður hefur sést á Reykjanesskaganum. 

Svo virðist sem kvikugangurinn virðist vera að teygja sig að svo stöddu í suðvestur. Það þýðir að gangurinn liggur frá Sundhnjúkagígum í gegnum Grindavík og svo áfram suðvestur eða nærri þrjá kílómetra í þá átt.

Möguleiki er á að opnast geti stór sprunga á svæðinu að sögn Elísabetar. Hún segir að vel sé fylgst með stöðu mála. Farið verði vel yfir gögnin öll í fyrramálið.

Gögnin geta bent til að að eldgos geti orðið á næstunni en ekkert er hægt að fullyrða um það að svo stöddu að sögn Elísabetar.

Eldgos og jarðhræringar Grindavík Eldgos á Reykjanesskaga

Mest lesið


Fleiri fréttir

Sjá meira


×

Mest lesið