„Bestu hug­myndirnar koma þegar það eru engar reglur“

Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.

Hvað finnst þér skemmtilegast við tískuna?

Að geta tjáð persónuleikann minn í gegnum tísku og geta fengið útrás fyrir sköpunarþörfinni í gegnum fatnað.

Hver er uppáhalds flíkin þín og af hverju?

FURA jakkinn minn frá Feldur Verkstæði, mjög falleg og eftirtektarverð flík sem passar einhvern veginn við allt og ég held mjög mikið upp á þessa flík. Auk þess eru gömul upphá 90's stígvél sem mamma átti þegar hún var ung í miklu uppáhaldi hjá mér.

Eyðirðu miklum tíma í að velja föt hverju sinni?

Það er mismunandi og fer eftir því hvert tilefnið er. Hvert ég er að fara og hvað ég er að fara gera. Í fataskápnum mínum má finna einfaldar vandaðar flíkur sem ganga við allt sem auðvitað einfaldar leikinn svolítið.

Hvernig myndirðu lýsa stílnum þínum?

Ég myndi segja að ég sé með fjölbreyttan stíl og elska að prófa nýja hluti. Ég versla mikið second-hand og tengi það síðan saman við minn eigin feminine blæ.

Hefur stíllinn þinn breyst mikið í gegnum tíðina og hvernig þá?

Já, mér finnst mjög mikilvægt að prófa nýja hluti og halda áfram að þróa stílinn minn í gegnum árin. Í dag einbeiti ég mér á að versla meira second-hand og vandaðar vörur sem endast. Fyrir nokkrum árum þá var maður meira að pæla í trendum og fleira en nú vel ég gæði umfram allt.

Hvaðan sækirðu innblástur í tískunni?

Frá fólkinu í kringum mig. Ég er umkringd fullt af fólki með mismunandi stíla. Ég fæ líka oft innblástur í gegnum samfélagsmiðla, margar hugmyndir sem spretta upp þaðan.

Ertu með einhver boð og bönn þegar það kemur að klæðaburði?

Í raun og veru ekki, bestu hugmyndirnar koma einmitt þegar maður er ekki með neinar reglur, er óhræddur við að prófa eitthvað nýtt og leyfa sér að hugsa út fyrir kassann.

Hver er eftirminnilegasta flík sem þú hefur klæðst og af hverju?

Gamall gallajakki sem Guðmundur kærastinn minn handmálaði og gaf þar af leiðandi flíkinni nýtt líf. Auk þess kjóll og pils sem Karen vinkona mín saumaði fyrir mig úr gamalli gardínu sem ég var hætt að nota.

Býrðu yfir einhverju góðu ráði þegar það kemur að tísku?

Fylgdu þínu innsæi og ekki vera hrædd við að prófa eitthvað nýtt.

Hér má fylgjast með Sigríði á samfélagsmiðlinum Instagram.