Veldu upp­á­halds­molana í konfekt­kassann þinn

Þá er það einnig orðin venja hjá ansi mörgum að stelast í konfektkassann við hin ýmsu tækifæri, því öll eigum við okkar uppáhaldsmola. Nú gefst fólki tækifæri á að velja eingöngu uppáhaldsmolana í konfektkassa fyrir sjálft sig eða þau sem standa hjarta þess næst. Á morgun, laugardaginn, 2. desember, mun Nói Síríus, í samstarfi við Hagkaup, bjóða gestum í Hagkaup Smáralind upp á að velja sjálfir eftirlætismolana í þar til gerða konfektkassa.

Eva Laufey Kjaran, markaðs- og upplifunarstjóri Hagkaups, hlakkar til samstarfsins. „Við erum mjög spennt að kynna þessa nýjung fyrir viðskiptavinum okkar í samvinnu við Nóa Síríus í desember. Konfekt er órjúfanlegur hluti af aðventunni og mjög spennandi að geta valið sinn uppáhalds mola þar sem smekkur manna er auðvitað misjafn. Því er kjörið tækifæri að koma og fylla öskjur af uppáhalds molunum. Við gátum ekki annað en sagt já við þessari skemmtilegu hugmynd frá Nóa og hlökkum til að fylgjast með hvernig móttökur súkkulaðibarinn fær hjá viðskiptavinum okkar,“ segir Eva Laufey.

Helga Beck, markaðsstjóri Nóa Síríus, er bjartsýn á viðtökurnar „Það er gaman að geta boðið upp á þessa nýjung og ég hef fulla trú á því að fólk taki því fagnandi að geta valið innihald konfektkassans algjörlega út frá eigin smekk eða fyrir sínar uppáhalds manneskjur,“ segir Helga og bætir því við að verði móttökurnar góðar megi eflaust vænta meira af slíku á komandi árum. „Fyrst og fremst erum við þó þakklát fyrir þann heiður að spila jafn stóra rullu og raun ber vitni í hátíðarhöldum landsmanna og auðvitað er gaman að sjá hversu mörg okkar eiga sinn uppáhalds konfektmola.“

Eins og áður sagði verður hægt að kaupa sérvalið Nóa Konfekt í Hagkaup Smáralind á morgun, 2. desember, milli klukkan 12 og 16. Hjalti Lýðsson, súkkulaðimeistari hjá Nóa Síríus, mun þar fara fyrir föngulegum hópi starfsfólks og aðstoða fólk við valið.