Vélinni snúið við á miðri leið

Vélin var á leið til München í Þýskalandi en vegna veðurs á áfangastað var tekin ákvörðun um að snúa henni við á miðri leið. Varað hefur verið við miklum snjóþyngslum í suðurhluta Þýskalands. Mbl greindi fyrst frá.

Vélin fór í loftið klukkan 07:25 í morgun samkvæmt upplýsingum á vef ISAVIA, en flugtími til München er um fjórar klukkustundir. 

Upplýsingafulltrúi ISAVIA hafði ekki frekari upplýsingar um málið. 

Ásdís Ýr Pétursdóttir, upplýsingafulltrúi Icelandair, segir í samtali við fréttastofu að vegna veðursins verði flugvöllurinn í München lokaður þangað til á morgun. 

„Við erum við bara að vinna í því að finna lausnir fyrir farþegana og erum að skoða hvort við þurfum stærri vél á morgun,“ segir Ásdís.

Unnið sé að því að finna lausnir fyrir farþega sem hafi átt flug til München og þá sem hafi átt bókað flug til baka. 

„Við erum bara að vinna í því að leysa það, þetta ætti að vera komið í lag í fyrramálið,“ segir Ásdís.

Fréttin var uppfærð klukkan 12:18 með upplýsingum frá Icelandair.