FC Kaup­manna­höfn fær grænt ljós á það að gleypa kvenna­lið FC Dam­sö

Eitt stærsta fótboltafélag Norðurlanda hefur ekki þótt ástæða til að vera með kvennalið í öll þessi ár en varð að gera eitthvað í þeim málum vegna nýrra reglna hjá Knattspyrnusambandi Evrópu, UEFA.

Nú verða félög að vera með starfandi kvennalið ætli þau að fá þátttökurétt fyrir karlaliðið sitt í Evrópukeppnum.

Forráðamenn FCK ákváðu að fara þá leið að yfirtaka annað kvennalið í stað þess að stofna sitt kvennalið frá grunni. Þetta er svipuð leið og Real Madrid fór á sínum tíma.

Sérstakur aðalfundur hjá FC Damsö samþykkti í vikunni að hefja samstarf með FC Kaupmannahöfn. FCK tekur yfir kvennalið félagsins og gerir að sínu. FCK sagði frá því á miðlum sínum að Damsö hafi samþykkt tilboðið.

FC Damsö spilar í dönsku C-deildinni. Það eru því að minnsta kosti tvö ár í það að FC Kaupmannahöfn eigi kvennalið í efstu deild.