Mikil hálka á vegum og í­búar í Grinda­vík hvattir til að fara var­lega

Í tilkynningu frá almannavörnum kemur fram að mikil hálka sé á vegum frá Grindavík og er því beint til íbúa að fara varlega. Talið er að eldgos sé yfirvofandi í Sundhnúkagígsröðinni og hefur virknin verið að færst í suður, í átt nær Grindavík.

„Hótelgestir sem gistu í Svartsengissvæðinu hafa yfirgefið svæðið og hefur fjöldahjálparstöð verið opnuð í Efstaleiti 9 í Reykjavík.

Þyrla Landhelgisgæslunnar er í viðbragðsstöðu.

Eldgos er ekki hafið en allt viðbragð miðar við að það sé yfirvofandi,“ segir í tilkynningunni.

Hófst rétt fyrir klukkan þrjú

Gögn frá Veðurstofunni sýna að það hafi hafist jarðskjálftahrina við Sundhnúksgíga rétt fyrir klukkan þrjú í nótt þegar hátt í tvö hundruð jarðskjálftar voru mældir á svæðinu. 

„Virknin hefur færst í átt að Grindavík. Bæði borholuþrýstingsmælingar (frá HS Orku) og rauntíma GPS stöðvar á svæðinu sýna einnig breytingar og því er líklegt að kvikuhlaup sé að eiga sér stað. Túlkun á þessum gögnum bendir til þess að eldgos sé yfirvofandi og er hraungos líklegasta sviðsmyndin.“