Nota Suður­strandar­veg á morgun en leita fleiri leiða

Þetta kemur fram í tilkynningu frá Almannavörnum. Þar segir að Vegagerðin verði á vaktinni og muni ryðja veginn ef þörf krefji. Slíkt sé líklegt miðað við veðurspá.

Nokkuð hefur borið á óánægju með skipulag verðmætabjörgunar í Grindavík sem hófst í dag. Meðal þess sem gagnrýnt hefur verið er að fólk sé látið keyra Suðurstrandarveg inn í bæinn.

Sjá einnig: Segir galið að aka Krýsuvíkurleiðina í að­stæðum eins og í morgun

„Grindavíkurbær er með þrjár virkar vegtengingar, Nesveg, Norðurljósaveg og Suðurstrandarveg. Enginn þessara vega er laus við vandamál þegar kemur að vetrarfærð og illa búin ökutæki munu verða til vandræða óháð undirbúningi viðbragðsaðila eða vali á akstursleið,“ segir í tilkynningu Almannavarna.

Af þessum þremur vegum sé Norðurljósavegur mikilvægastur, sökum nálægðar við Reykjanesbraut. Vegurinn sé laskaður vegna sprungumyndunar og mikillar umferðar. Hætt sé við því að ef allri umferð íbúa yrði beint um veginn myndi hann teppast vegna umferðar, óhappa, bilana eða annarra orsaka. 

Þá segir að umferð um Suðurstrandaveg verði minni umferð um skilgreind hættusvæði númer 1 og 3 á hættukorti Veðurstofunnar, sem sjá má hér að neðan. 

„Það er ljóst að Suðurstrandarvegurinn er langt frá því að vera ákjósanlegur. Hann hefur þó það umfram Nesveg að innviðir eru til staðar til að taka á móti miklum fjölda ökutækja á skömmum tíma.

Auk þess þýðir það að að viðbragðsaðilar, t.d. sjúkrabifreiðar, færu um Nes- eða Suðurstrandaveg sem talin er óásættanleg áhætta. Einnig myndi það þýða miklar tafir á sjálfu verkefninu sem lagt er mikið kapp á að gangi sem best.“

Þá þurfi forsvarsmenn fyrirtækja einnig að vitja eigna þeirra, en Nesvegur sé nýttur til þess svo minnka megi samkeyrslu þungaflutninga og íbúa. Það sé gert út frá því mati á þeim viðgerðum sem þurft hefur að ráðast í á vegakerfi Grindavíkur og þeim þunga og ágangi sem það þolir.

„Að þessu sögðu fer sífellt fram mat á aðstæðum og leitað er leiða til að besta þetta verklag til að hámarka öryggi og ávinning allra hlutaðeigandi.

Er því meðal annars leitað leiða til að fjölga akstursleiðum íbúa inn í Grindavík og ekki loku fyrir það skotið að akstursskipulag taki breytingum eftir því sem líður á verkefnið.“