Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.
Hvenær vaknar þú á morgnana?
„Ég vakna yfirleitt klukkan 7:10 nema ef ég ætla í sturtu þá þarf ég að vakna fyrr. Ég er með tvo unglinga á heimilinu og það er barist um sturtutímann á morgnana.“
Hvað er það fyrsta sem þú gerir á morgnana?
„Við maðurinn minn vekjum yngsta gaurinn, þennan sjö ára, en þau eldri sjá um sig sjálf. Ég passa að láta hann lesa heimalesturinn á meðan hann fær sér morgunmat því hann hefur ekki nokkra þolinmæði fyrir því í lok dags þegar hann vill bara vera að leika sér með vinunum.
Ég næ svo stundum að eiga smá móment fyrir sjálfa mig þegar krakkarnir eru lögð af stað í skólann sem er oft ein af uppáhalds stundum dagsins. Skrepp kannski í ræktina ef ég næ því eða bara les fréttir og fæ mér morgunmat í rólegheitum.“
Hvaða nammikyns freistingu áttu alltaf erfitt með að standast?
Allt sem er blanda af súkkulaði og einhverju söltu með smá krönsi. Til dæmis súkkulaði-snakkið Smash sem fyrir þá sem ekki vita er eins og súkkulaðihúðað Bugles. Einfaldlega ómótstæðileg blanda!
Það er vísindalega sannað að líkaminn getur ekki staðist þetta kombó af sykri, fitu og salti og munnurinn minn er hjartanlega sammála.“
Í hvaða verkefni ertu að vinna helst í þessa dagana?
„Við hjá Festu vorum að ljúka við stærsta viðburð ársins hjá okkur sem er Janúarráðstefna Festu og að þessu sinni héldum við líka hliðarviðburði svo sem hringborðsumræður leiðtoga og ungmennafund um seiglu. Þannig að þessa dagana er ég að gera upp þessa veislu og kjarna það sem við tökum með okkur út úr ótal áhugaverðum samtölum.
Annars er Festa svo svakalega gróskumikið félag og verkefnin svo fjölbreytt að það er eiginlega erfitt að segjast vera að vinna við eitthvað eitt. Það er stefnumótun framundan hjá okkur og fyrirséð að þar komi inn ákveðin þemu svo sem reglugerðarumhverfi rekstraraðila og sjálfbær fjármögnun, félagsleg sjálfbærni, aukin tengslamyndum á innan félagsins og samstarf við hið opinbera.
Við erum að ýta úr vör mjög spennandi Loftslagsleiðtoga hópi sem mun láta til sín taka á árinu, við verðum með fókus á hringrásarhagkerfið og samþættingu okkar verkefna við áherslur velsældarhagkerfisins.“
Hvernig skipuleggur þú þig í vinnu?
„Ég er mjög sveigjanleg í því hvernig ég vinn sem hentar vel í þessu starfi.
Sum verkefni eru þess eðlis að það er nauðsynlegt að vera með mikla yfirsýn, mælanleg markmið og vel sundurgreinda verkþætti.
Önnur verkefni vinnast einfaldlega betur í meira flæði og þá þarf maður að leyfa öldunni að hrífa sig með þótt allt sé ekki endilega ferlað eða skilgreint.
Það er sennilega gott að vera einhver blanda af gallhörðum verkefnastjóra og draumóramanneskju í þessu sem öðru.“
Hvenær ferðu að sofa á kvöldin?
„Svona frekar í fyrra fallinu. Mér finnst gott að vera komin upp í klukkan hálf ellefu og ná svo að liggja og lesa í kannski góðan klukkutíma. Ég er mikill bókaormur, er í bókaklúbbi og veit ekkert betra en að týna mér í góðri sögu. Ég get reyndar illa sofnað án þess að lesa fyrir svefninn sem veldur því að ég missi iðulega bókina eða Kindle-inn ofan á nefið á mér þegar ég er eiginlega sofnuð með bókina enn á lofti.“
