Fram í annað sætið eftir stór­sigur

Fyrir leikinn var Fram í þriðja sætinu og var tveimur stigum á eftir Haukum sem áttu þó leik til góða. Stjarnan var hins vegar í 6. sæti og í baráttu við Aftureldingu og KA/Þór í sætunum fyrir neðan.

Fram byrjaði af miklum krafti og komst í 7-1 í Garðabænum í dag. Í stöðunni 10-3 náðu heimakonur hins vegar að skora fimm mörk í röð og minnka muninn í tvö mörk. Staðan í hálfleik var 12-9 Frömurum í vil.

Stjörnukonur náðu að halda í við Framliðið framan af síðari hálfleiknum. Fram var þó alltaf með forystuna og í stöðunni 20-17 stungu þær algjörlega af og gengu frá leiknum. Fram skoraði sjö mörk í röð og munurinn orðinn tíu mörk. Lokatölur 30-20 og Fram er því jafnt Haukum að stigum í 2. - 3. sæti Olís-deildarinnar en Haukar eiga tvo leiki til góða.

Eva Björk Davíðsdóttir skoraði 8 mörk fyrir Stjörnuna en Alfa Brá Hagalín skoraði 9 fyrir Fram. Andrea Gunnlaugsdóttir var með um 40% vörslu í liði Fram líkt og Elísabet Millý Elíasardóttir hjá Stjörnunni.

Öruggt hjá ÍR í Breiðholtinu

ÍR vann sinn áttunda sigur í Olís-deildinni þegar liðið lagði botnlið KA/Þór á heimavelli. ÍR náði yfirhöndinni snemma og komst í 10-5 og leiddi 12-6 að loknum fyrri hálfleiknum.

ÍR var í 5. sæti fyrir leikinn en KA/Þór í neðsta sætinu. ÍR byrjaði síðari hálfleikinn af miklum krafti og komst í 15-7. Það var of mikil munur fyrir botnliðið að brúa.

ÍR sigldi sigrinum örugglega í höfn og náðu mest níu marka forskoti í síðari hálfleik. Lokatölur 22-17 og ÍR nú jafnt ÍBV að stigum í 4. - 5. sæti Olís-deildarinnar en KA/Þór er áfram á botninum.

Karen Tinna Demian skoraði átta mörk fyrir ÍR í dag og Hildur Öder Einarsdottir var frábær í markinu með 45% markvörslu. Hjá KA/Þór varði Matea Lonac 9 skot eða um 30% þeirra skota sem hún fékk á sig og Anna Þyrí Einarsdóttir var markahæst með fjögur mörk.