Fredericia úr leik í bikarnum eftir fram­lengdan leik

Liðin tvö mættust í deildinni á dögunum þar sem GOG fór með nokkuð öruggan sigur af hólmi en Fredericia er í 2. sæti úrvalsdeildarinnar á meðan GOG er í 4. sætinu.

Fredericia byrjaði mun betur í leiknum í dag. Liðið komst í 8-3 snemma leiks en leiddi með þremur mörkum í hálfleik eftir að GOG skoraði þrjú af síðustu fjórum mörkum fyrri hálfleiks. Staðan að honum loknum 17-14 fyrir lærisveina Guðmundar.

Í seinni hálfleik náði GOG að snúa stöðunni við og náði 7-1 kafla í upphafi síðari hálfleik. Lið Fredericia jafnaði á ný en GOG komst aftur þremur mörkum yfir og leiddi 28-25 þegar tíu mínútur voru eftir.

Þær mínútur voru æsispennandi. Fredericia jafnaði í 28-28 og í stöðunni 29-29 stal Einar Þorsteinn boltanum en mistókst að skora úr hraðaupphlaupinu í kjölfarið. Að loknum venjulegum leiktíma var staðan 30-30 og því þurfti að grípa til framlengingar.

Þar gekk liðunum illa að skora í upphafi og bæði lið misnotuðu vítaskot í fyrri hluta framlengingarinnar. Emil Madsen skoraði eina markið þar en í seinni hálfleik gekk GOG frá leiknum. Emil Madsen getur í raun einn tekið heiðurinn fyrir sigri GOG því hann skoraði nítján mörk í leiknum og þar af þrjú af fjórum mörkum liðsins í framlengingunni.

Einar Þorsteinn Ólafsson lék í vörn GOG í dag en tókst ekki að skora úr eina skoti hans í leiknum.