Pirrar sig á Ronaldo: „Þegiðu bara“

Ronaldo var nýverið dæmdur í eins leiks bann vegna dónalegrar bendingar hans upp í stúku þegar áhorfendur kyrjuðu nafn Messi og beindu því að Ronaldo. Slíkt hefur gerst ítrekað í sádísku deildinni á leikjum Ronaldo undanfarið, og virðist til þess gert að pirra portúgölsku stjörnuna.

Messi lék með Paris Saint Germain í Frakklandi áður en hann skipti til Inter Miami í Bandaríkjunum í fyrra en ummæli Ronaldo um frönsku deildina fyrr á þessu ári virðast hafa farið fyrir brjóstið á Frank Leboeuf, fyrrum leikmanni Marseille, Chelsea og franska landsliðsins.

„Hreinskilningslega er sádíska deildin ekki verri en sú franska, finnst mér. Í frönsku deildinni eru tvö eða þrjú lið á háu stigi. En í Sádi-Arabíu er samkeppnin meiri. Mér þykir við vera betri en franska deildin og erum enn að bæta okkur,“ lét Ronaldo hafa eftir sér.

Illa vegið að frönsku deildinni

Leboeuf telur veru Messi í Frakklandi hafa hvatt til ummæla Ronaldo. Þá segir hann Ronaldo eiga að vita hvenær hann eigi að þegja.

„Þetta pirrar mig. Af hverju helduru að hann nefni frönsku deildina frekar en til dæmis þá portúgölsku? Vegna þess að Messi spilaði í Frakklandi,“

„Ég ber mikla virðingu fyrir honum sem leikmanni, en láttu ekki svona, þegiðu bara. Þetta er ósanngjarnt gagnvart frönsku deildinni,“ segir Leboeuf sem bætir svo við að Ronaldo sé kominn á endastöð sem leikmaður.

Portúgal geti unnið, án Ronaldo

„Það er ekki hægt að taka neitt af Ronaldo, hvað hann hefur gert fyrir fótboltann, bara vegna þess að hann ætlar að klára ferilinn í Sádi-Arabíu. Ég vil þakka honum fyrir að hafa reist ránna í íþróttinni en það kemur að endapunkti hjá öllum,“ segir Leboeuf en hann lauk sjálfur ferli sínum í Katar. 

Þá, árin eftir aldamót, fóru lið í katörsku deildinni svipaða leið og þau í Sádi-Arabíu þessi dægrin, og buðu stórum nöfnum í Evrópu háar fjárhæðir til að stækka ímynd og frægð deildarinnar. Þar á meðal voru Pep Guardiola, De Boer-bræður frá Hollandi, Gabriel Batistuta og Marcel Desailly, auk Leboeuf.

Leboeuf vann á sínum tíma HM og EM með Frökkum, 1998 og 2000, og telur Portúgala eiga möguleika á Evróputitlinum í Þýskalandi í sumar, en að hinn 39 ára gamli Ronaldo dragi úr sigurlíkunum.

„Ég held að Portúgal sé á meðal þeirra sem muni keppa um Evróputitilinn í sumar. Ég tel að þeir geti hreinlega unnið mótið, en bara ef Cristiano Ronaldo spilar ekki.“