Banka­stjóri segir það hennar hlut­verk að reka Lands­bankann

Landsbankinn hefur ákveðið að kaupa tryggingafélagið TM af Kviku banka fyrir 26,8 milljarða króna sem er innan við 10 prósent af eigin fé bankans. Fjármálaráðherra brást illa við þessum fréttum í færslu á Facebook í gærkvöldi, þar sem hún er stödd á fundi hjá Sameinuðu þjóðunum í New York.

„Ríkisfyrirtæki á ekki að kaupa tryggingafélag,“ segir fjármálaráðherra. Þessi viðskipti verði ekki að veruleika með hennar samþykki nema söluferli Landsbankans hefjist samhliða. Hún hafi óskað eftir skýringum frá Bankasýslu ríkisins sem fari með eignarhlut ríkisins bankanum, setji almenn viðmið um áherslur í rekstri auk þess að fylgja eftir eigendastefnu ríkisins.

„Ég skil vel að ríkið vilji ekki bæta við sig félögum. Við erum aftur á móti almenningshlutafélag. Ríkið á stóran hluta af því. Ég held að það sé mjög mikilvægt fyrir okkur að hafa alltaf augun á því hvernig við getum aukið verðmæti bankans. Séð til þess að þetta félag sé áfram verðmæt eign, hvort sem það er þjóðarinnar eða annarra hluthafa,“ segir Lilja Björk Einarsdóttir bankastjóri Landsbankans.

Bankinn hafi verið vel rekinn og greitt hluthöfum um 175 milljarða í arð á undanförnum árum. Kaupin muni auka verðmæti bankans.

Þannig að skoðanir fjármálaráðherra á þessum gjörningum hafa ekki áhrif á ykkur?

„Auðvitað skiptir máli hvað fjármálaráðherra segir og við hlustum vel. En það er líka mitt starf að reka bankann vel og nýta þau tækifæri sem gefast til að auka verðmæti bankans. Ég verð að hafa augun á því, það er okkar starf hér,“ segir Lilja Björk.

Bankasýslunni hafi verið kunnugt um áhuga Landsbankans á tryggingum.

„En síðan eru þessi kaup núna á TM á forræði stjórnar bankans. Þar er ákvörðun tekin um að fara í þessi kaup,“ segir bankastjórinn. Kaup sem þessi gerðust hins vegar ekki á nokkrum dögum. Skrifað væri undir kaupsamning með fyrirvara um áræðaleikakönnun og eftirlitsstofnanir ættu eftir að segja sitt.

„Þetta verða þó nokkrir mánuðir þangað til þetta er allt yfirstaðið. Þannig að kannski fyrir jól væri eðlileg tímalína,“ segir Lilja Björk Einarsdóttir.

Hins vegar fer aðalfundur Landsbankans fram á miðvikudag. Tryggvi Pálsson stjórnarformaður Bankasýslunnar vildi ekkert segja um afstöðu hennar til málsins þegar eftir því var leitað í dag. Afstaða Bankasýslunnar kann hins vegar að koma fram á aðalfundinum á miðvikudag og málið verður væntanlega einnig rætt á ríkisstjórnarfundi á morgun.