Borga tugi milljóna til að eignast Andra Lucas

Andri Lucas kom að láni frá sænska félaginu Norrköping í ágúst og er á meðal markahæstu leikmanna dönsku úrvalsdeildarinnar í vetur, með níu mörk í tuttugu leikjum. Þá hefur þessi 22 ára framherji stimplað sig inn í íslenska landsliðið og lék hann báða leikina í EM-umspilinu í mars, og er kominn með sex mörk í 22 A-landsleikjum.

Yfirmaður íþróttamála hjá Norrköping viðurkennir að Andri snúi væntanlega ekki aftur til félagsins, og segir að félögin eigi í viðræðum. Klásúla sé í samningi Andra við Norrköping sem geri hann falan fyrir ákveðna upphæð.

Samkvæmt danska miðlinum Tipsbladet nemur sú upphæð á bilinu 30-40 milljónum íslenskra króna.

Andri Lucas kom til Norrköping sumarið 2022, eftir að hafa verið leikmaður varaliðs spænska stórveldisins Real Madrid.

Hann fékk hins vegar fá tækifæri til að sanna sig með Norrköping, og spilaði samtals aðeins fjóra deildarleiki í byrjunarliði á tveimur árum.

„Þegar við fengum hann þá var ætlunin sú að hann myndi styrkja okkur en af ólíkum ástæðum þá náði hann því ekki,“ sagði Tony Martinsson, yfirmaður íþróttamála hjá Norrköping, við Fotbollskanalen.

„Þetta er virkilega góður leikmaður. Ég er ekki hissa [á því hve vel hann hefur staðið sig með Lyngby],“ sagði Martinsson.