„Arnar fór langt yfir strikið“ en nafni hans oftar með dóna­skap

Þetta var að minnsta kosti mál manna í Stúkunni á Stöð 2 Sport í gærkvöld þar sem jafnframt var farið yfir hve mörgum spjöldum þjálfararnir hefðu safnað á undanförnum árum.

Arnar missti stjórn á skapi sínu í gær, í 3-2 sigri Vals á Breiðabliki, snemma í seinni hálfleik þegar hann mótmælti seinna gula spjaldinu og því rauða sem Adam Ægir Pálsson fékk, fyrir kjaftbrúk.

„Ég get skilið að menn séu reiðir og sýni tilfinningar, en þú getur gert það kurteisislega samt sem áður. Þú verður að ráða við sjálfan þig,“ sagði Gummi Ben í Stúkunni í gær og vísaði til Arnars Grétarssonar þjálfara, en umræðuna má sjá hér að neðan.

„Ekki spurning. Arnar [Grétarsson] fer langt yfir strikið, miðað við það sem við sjáum þarna. Eina rétta niðurstaðan úr þessu atviki var að Arnar færi inn í klefa með skömm í hattinn og rautt spjald á bakinu. Hann fór langt yfir strikið,“ sagði Atli Viðar Björnsson og Baldur Sigurðsson tók í sama streng.

„Ekki nýjar reglur að menn megi ekki vera svona ókurteisir“

„Arnar verður bara að ráða við sig. Hann breytir ekki dómunum með því að tryllast bara og láta menn heyra það. Þá fer hann bara í bann, og mögulega tveggja leikja bann því hann hélt áfram að láta menn heyra það eftir að hafa fengið rauða spjaldið. Þá þarf aðstoðarþjálfarinn að taka við, sem er tækifæri fyrir hann, en það er ekki gott fyrir liðið að missa aðalþjálfara sinn. Menn verða að aðlaga sig að aðstæðum, breyttum reglum eða forsendum, sama hversu ósáttir þeir eru við þær,“ sagði Baldur og Gummi bætti þá við:

„Það eru ekki nýjar reglur að menn megi ekki vera svona ókurteisir – með svona munnsöfnuð.“

„Ég virði það við Arnar Grétarsson að verja sinn mann Adam Ægi, en ef það er rétt sem hann segir að „bekkurinn“ hjá Blikum hafi náð að espa hann upp þá er það náttúrulega hann sem gengur í gildru. Það sem hann [Adam] segir verðskuldar sannarlega gult spjald,“ sagði Atli Viðar.

Arnar „margoft“ gerst sekur um dónaskap

Sérfræðingarnir skoðuðu svo einnig töflu yfir þjálfara og hve mörgum spjöldum þeir hafa safnað síðan Arnar Gunnlaugsson tók við Víkingi, en hann er á sinni sjöttu leiktíð með meistarana.

„Frá því að Arnar Gunnlaugsson tók við Víkingum hefur hann á einhvern ótrúlegan máta náð í 19 gul spjöld, ég held að þetta sé heimsmet hjá þjálfara, og fimm rauð spjöld,“ sagði Gummi.

Arnar Grétarsson er á sama tíma kominn með þrjú rauð og tíu gul, og Rúnar Kristinsson með níu gul og ekkert rautt. Heimir Guðjónsson er með þrjú gul en starfaði í Færeyjum 2018 og 2019.

„Auðvitað hefur bekkurinn hjá Víkingi verið margumræddur fyrir að vera með mikil læti og mikinn hasar. Arnar hefur einhvern tímann tekið skellinn en hann hefur líka margoft gerst sekur um það að fara yfir strikið og vera dónalegur, og fengið verðskuldaðar refsingar,“ sagði Atli Viðar.

„Öll tölfræði sýnir það að Arnar Gunnlaugsson er langgrófasti þjálfarinn í deildinni. Er það ekki Arnar? Við erum með gögn til að styðja það,“ sagði Gummi léttur og vísaði í viðtal við Arnar Gunnlaugsson sem hnýtti í það að Víkingum væri lýst sem grófasta liði deildarinnar.

Umræðuna alla má sjá í spilaranum hér að ofan.