Tveir leikir á Akur­eyri og bikar­meistararnir lentu á móti Fylki

Átta liða úrslitin eiga að vera spiluð 11. og 12. júní í kvennaflokki og 12. og 13. júní í karlaflokki.

Það verða krýndir nýir bikarmeistarar í kvennaflokki þar sem bikarmeistarar Víkings duttu út á móti Aftureldingu í sextán liða úrslitunum. Bikarmeistarar Víkings í karlaflokki eru aftur á móti enn á lífi í keppninni en þeir hafa unnið síðustu fjóra bikarúrslitaleiki.

Breiðablik, Valur og Þór/KA eru þrjú efstu liðin í Bestu deildinni en þau sluppu við hvert annað í drættinum. Bestu deildar slagirnir eru tveir, annars vegar leikur Breiðabliks og Keflavíkur og hins vegar leikur FH og Þór/KA.

Lengjudeildarlið Grindavíkur og Aftureldingar fá bæði heimaleiki en Grindvíkingar fá topplið Vals í heimsókn en Mosfellingar taka á móti Þrótti.

Bikarmeistarar Víkings fá Fylki í heimsókn í karlaflokki og Valsmenn heimsækja Lengjudeildarlið Keflavíkur. Keflavík hefur slegið út Bestu deildarlið Breiðabliks og ÍA til þessa í keppninni.

Víkingur-Fylkir er annar af tveimur Bestu deildar slögum átta liða úrslitanna en hinn verður á milli KA og Fram fyrir norðan.

Akureyrarliðin fengu því bæði heimaleik, því Lengjudeildarlið Þórs frá Akureyri fær heimaleik á móti Stjörnunni.