Veita við­tal um Hamraborgarmálið í fyrsta sinn: Viðvörunarkerfi í bílnum hefði getað gert illt verra

Næstum tveir mánuðir upp á dag eru nú frá því að tugum milljóna var stolið úr bíl Öryggismiðstöðvarinnar fyrir framan krána Catalinu í Hamraborg. Lögregla hefur haldið þétt að sér spilunum um málið undanfarið og það hefur Öryggismiðstöðin sjálf einnig gert, raunar alveg frá því málið kom upp. Fyrirtækið hefur hingað til aðeins svarað fyrirspurnum fjölmiðla skriflega og ekki orðið við viðtalsbeiðnum. Fyrr en í dag.

Hvers vegna var svona auðvelt að brjótast inn í bíl með svona miklum verðmætum? 

„Samkvæmt okkar áhættumati erum við fyrst og fremst að leggja áherslu á varnarbúnaðinn sem er inni í bílnum. Bíllinn er í raun aukaatriði þegar kemur að þessum flokki og er að fullu samanburðarhæfur við það sem gengur og gerist í Evrópu,“ segir Ómar Brynjólfsson, framkvæmdastjóri mannaðra lausna hjá Öryggismiðstöðinni.

Með hugtakinu „varnarbúnaði“ á Ómar við töskurnar sem peningarnir voru í; sérstakar verðmætaflutningatöskur með litasprengjum. Sá búnaður hafi virkað sem skyldi. En málið hafi vissulega orðið til þess að verkferlar voru uppfærðir.

Geturðu eitthvað farið nánar út í það? 

„Því miður get ég ekki farið nánar út í þá ferla en það sem ég get sagt er að við höfum gert breytingar til þess að bregðast við þessu.“ 

Hafið þið þá gert bílana öruggari? 

„Við höfum bætt í búnað í bílum, já.“

Telja verkferla ekki hafa verið brotna

Eins og sést í upptöku af þjófnaðinum tók það þjófana aðeins rúmar þrjátíu sekúndur að brjótast inn í bílinn og hafa milljónirnar á brott með sér. Ómar segist vissulega staldra við það hversu skamman tima innbrotið tók. Ekkert viðvörunarkerfi var í bílnum sem hefði getað gert starfsmönnunum viðvart um þjófnaðinn og Ómar efast raunar um ávinning af slíku.

„Fyrst og fremst erum við að leggja áherslu á öryggi okkar starfsmanna. Ég vil ekki hugsa til þess að það hefði verið búnaður og þeir hefðu hlaupið í flasið á mönnum sem voru að athafna sig við rán. Það hefði getað orðið mjög slæmt.“

Voru þeir áminntir eða urðu einhverjar afleiðingar af þessu fyrir þá [starfsmennina]? 

„Það voru engar afleiðingar. Enda teljum við ekki að okkar ferlar hafi verið brotnir á þann veg að það hafi orðið þess valdandi að þetta rán varð. Þetta er atburður sem var fyrir utan okkar stjórn,“ segir Ómar.

Íslendingi grunuðum um aðild að málinu var sleppt úr gæsluvarðhaldi fyrir tveimur vikum en engir fleiri hafa verið handteknir. Þá hefur ekki fundist meira af lituðum peningum í umferð síðustu vikur, samkvæmt upplýsingum frá lögreglu.