Dúxaði í Verzló með tíu í ein­kunn og ári á undan í skóla

Guðrún Inga Sívertsen skólastjóri flutti nemendum kveðjuorð sín þar sem hún hvatti nemendur til að vera óhrædda við að prófa nýjar leiðir þar sem þeirra kynslóð stæði frammi fyrir miklum áskorunum hvort sem horft væri til heimsmála eða tækniþróunar. Hún lagði einnig áherslu á hversu mikilvægt það væri að halda tengslum og rækta vináttuna sem myndast hefur í Verzló. Að tilheyra hópi, árgangi sem útskrifast saman, sé dýrmætt.

Að vanda var úthlutað úr VÍ 100 sjóðnum en hann var stofnaður í tilefni af 100 ára afmæli skólans. Fyrrverandi nemendur skólans lögðu fé í sjóðinn og í skipulagsskrá fyrir sjóðinn segir meðal annars að árlega skuli hann styrkja valda nemendur með fjárframlagi, þegar þeir flytjast milli bekkja eða ljúka stúdentsprófi. Skal við það miðað að styrkþegar hafi sýnt afburða námsárangur eða lagt verulega af mörkum til skólastarfsins á annan hátt.

Dúx skólans var Ragna María Sverrisdóttir í 3-X, með I. ágætiseinkunn; 10,0. Hlaut hún bókagjöf og námsstyrk. Semidúxinn var Nói Pétur Á. Guðnason í 3-D, með I. ágætiseinkunn; 9,9 og hlaut hann bókagjöf og námsstyrk.

Nemendur með 9,5 og hærra fengu einnig bókagjafir og námsstyrk og voru það eftirfarandi nemendur:

• Róbert Dennis Solomon 9,8
• Selma Sól Sigurjónsdóttir 9,7
• Salka Heiður Högnadóttir 9,7
• Kolbrún Hilda Gunnarsdóttir 9,6
• Mikael Bjarki Ómarsson 9,5
• Bjartþór Steinn Alexandersson 9,5

Jafnframt voru veitt verðlaun fyrir bestan námsárangur að loknu 1. og 2. ári og voru það eftirfarandi nemendur:

• Vilhjálmur Geir Geirsson 9,9
• Vala Katrín Guðmundsdóttir 9,7
• Inga Júlíana Jónsdóttir 9,7

Nýútskrifaðir Verzlingar héldu í morgun í útskriftarferð til Króatíu. Það gekk ekki áfallalaust fyrir sig. Aflýsa þurfti flugferðinni eftir að þjónustubíll rakst utan í ítalska leiguflugvél. Hluti hópsins komst með annarri vél en opnunarteiti sem fara átti fram í kvöld hefur verið frestað um sólarhring til að tryggja að allur hópurinn verði kominn utan.